Dowladda Federaalka ayaa ciidamo kale oo ka tirsan Kumaandooska Gorgor, waxay gaysay Magaalada Baydhabo ee Xarunta Gobolka Baay.
Ciidamadan ayaa waxaa lagu soo dhaweeyay Garoonka Diyaaradaha Shaati-gaduud, iyagoona la socday diyaarad ka timid dhinaca Caasimadda Muqdisho.
Saraakiisha Qaybta 60aad ee Ciidanka Xoogga Dalka ee fadhigoodu yahay Magaalada Baydhabo ayaa kuu sheegaya in ciidamadan ay kordhin cusub u noqon doonaan ciidamada kale ee ku sugan duleedyada magaaladaasi.
Dowladda Federaalka ayaa taageero buuxda siineysa maamulka cusub ee Dowlad Goboleedka Koonfur Galbeed ee uu madaxda u yahay Aadan Maxamed Nuur (Aadan Madoobe), kaas oo wajahaya mucaaradad xoog leh oo kaga imaneysa Madaxweynihii hore ee Koonfur Galbeed, Cabdicasiis Xasan Maxamed (Laftagareen) oo ciidamada taabacsan ay culeys amni ku hayaan magaaladaasi.
Dhanka kale Taliyaha Qaybta 60aad ee Ciidanka Xoogga Dalka, G/dhexe Isaaq Aadan Berdaale iyo Wasiirka Amniga Koonfur Galbeed, Isaaq Maxamed Isaaq (Koosaar) ayaa Sabtidan isla shir guddoomiyay kulan looga hadlayay dib-u-habaynta ciidamada, amniga iyo difaaca Baydhabo.
Kulanka oo ay ka qaybgaleen Saraakiil uu ka mid yahay Taliyaha Qaybta Booliska Gobolka Baay, Korneyl Mukhtaar Maxamed Dugudow ayaa diiradda lagu saaray, sidii Ciidamada Qalabka Sida ay wada-shaqayn dhow u yeelan lahaayeen, loona adkayn lahaa difaaca magaalada.
Xiisadda siyaasadeed iyo midka ciidan ee ka taagan Koonfur Galbeed, una u dhexeeya maamulka hadda jira iyo hoggaankii hore ayaa si taban u saameynaya xasilloonida Baydhabo, bacdamaa ay Baydhabo tahay Xarunta KMG Dowlad Goboleedka Koonfur Galbeed.
sidoo kale General Xaamud oo ka degay garoonka shaati gaduud airport magaalada Baydhabo
Taliyaha Ciidanka Asluubta Soomaaliyeed, General Maxamed Sheekh Xasan Xaamud ayaa galabta gaaray Magaalada Baydhabo ee Xarunta KMG Dowlad Goboleedka Koonfur Galbeed.
Saraakiisha Qaybta 60aad ee Ciidanka Xoogga Dalka, Booliska Gobolka Baay iyo kuwa Asluubta ayaa Taliyaha ku soo dhaweeyay Garoonka Diyaaradaha Shaati-gaduud.
War ka soo baxay Xafiiska Taliyaha Ciidanka Asluubta ayaa lagu sheegay in General Xaamud uu safar shaqo ku yimid Baydhabo, isla-markaana uu kormeer ku samayn doono xarumaha ciidamada.
Tallaabadan ayaa qayb ka ah tallaabooyinka ay Dowladda Federaalka kaga jawaabeyso codsi uu toddobaadkii hore u soo jeediyay Hoggaamiyaha Dowlad Goboleedka Koonfur Galbeed, Aadan Maxamed Nuur (Aadan Madoobe) oo la xiriiray in Baydhabo loo soo diro Saraakiil khibrad leh oo ka caawiya howlaha sugidda amniga iyo wixii ciidan ah ee laga maarmi karo.
Aadan Madoobe ayaa waxa uu loolan kala dhexeeyaa Madaxweynihii hore ee Koonfur Galbeed, Cabdicasiis Xasan Maxamed (Laftagareen) oo diiday in uu aqoonsado madaxtinimadiisa.
Labada garab ayaa mid kasta, waxa uu isku dayayaa in uu awood ciidan iyo mid siyaasadeed ku muujiyo Baydhabo, oo ah xarunta uu maamulku ku shaqeeyo.
Loolanka u dhexeeya maamulka cusub iyo hoggaankii hore ayaa dhabaha u xaaraya xasillooni darro baahsan, oo haddaba la arki karo sida ay u saameynayso amniga iyo xasilloonida Magaalada Baydhabo.
