Wasiirka Wasaaradda Qoyska iyo Horumarinta Xuquuqul Insaanka Xukuumadda Federaalka Soomaaliya, Amb. Khadiija Maxamed Al-Makhzoumi, ayaa maanta mar kale hortagtay Xildhibaannada Golaha Shacabka Baarlamaanka Jamhuuriyadda Federaalka Soomaaliya, iyadoo laga dhammaystirayay akhrinta koowaad ee Hindise Sharciyeedka Sharciga Arrimaha Qoyska iyo Hindise Sharciyeedka Xuquuqda Carruurta.
Intii uu socday kulanka, Xildhibaannada Golaha Shacabka ayaa Wasiirka weydiiyay su’aalo iyo faahfaahin la xiriirta qodobbada labada hindise sharciyeed.
Su’aalaha ayaa si gaar ah diiradda loogu saaray arrimaha saameynaya qoysaska Soomaaliyeed iyo sidii loo xoojin lahaa ilaalinta iyo daryeelka carruurta.
Wasiir Khadiija Al-Makhzoumi ayaa ka jawaabtay su’aalihii Xildhibaannadu soo jeediyeen, iyadoo tilmaantay in talooyinka iyo aragtiyada laga dhiibtay labada hindise ay muujinayaan muhiimadda ay Baarlamaanku siinayaan shuruucda lagu ilaalinayo qoyska iyo xuquuqda carruurta.
Wasaaradda Qoyska iyo Horumarinta Xuquuqul Insaanka ayaa aaminsan in labada sharci ay door muhiim ah ka qaadan karaan xoojinta ilaalinta qoysaska, daryeelka carruurta iyo sugidda xuquuqdooda, iyadoo la raacayo shuruucda dalka iyo mabaadi’da ilaalinta xuquuqda aadanaha.
Ugu dambeyn, Wasiirku waxay rajo ka muujisay in Golaha Shacabka uu ansixiyo labada Hindise Sharciyeed, iyadoo xustay in ay muhiimad gaar ah u leeyihiin bulshada Soomaaliyeed, isla markaana ay soo baxayaan xilli loo baahan yahay in la xoojiyo nidaamka sharciyeed ee lagu ilaalinayo qoysaska iyo carruurta dalka.
Labadan hindise sharciyeed ayaa hadda ku jira geeddi-socodka baarlamaanka, waxaana la filayaa in doodaha iyo talooyinka Xildhibaannadu ay qeyb ka noqdaan horumarinta iyo dhammeystirka shuruucdan.
