Madaxweynaha Jamhuuriyadda Federaalka Soomaaliya, ahna Taliyaha Guud ee Ciidamada Qalabka Sida, Mudane Dr. Xasan Sheekh Maxamuud, ayaa warbixin guud ka dhageystay Taliska Ciidanka Xoogga Dalka Soomaaliyeed, taas oo la xiriirtay xaaladda guud ee ciidanka, howlgallada socda iyo qorshayaasha horumarinta ciidamada.
Taliyaha Ciidanka Xoogga Dalka Soomaaliyeed, S/Guuto Ibraahim Maxamed Maxamuud, ayaa Madaxweynaha ka warbixiyay howlgalladii ugu dambeeyay ee lagu ciribtirayay cadowga umadda Soomaaliyeed ee Shabaab iyo guulaha laga gaaray sugidda amniga dalka.
Sidoo kale, Taliyaha ayaa Madaxweynaha la wadaagay qorshayaasha dhow iyo kuwa fog ee lagu horumarinayo, laguna casriyeynayo Ciidanka Xoogga Dalka Soomaaliyeed, si ay u yeeshaan awood buuxda oo ay ku xaqiijiyaan amniga iyo xasilloonida dalka.
Ugu dambeyn, Madaxweynaha Jamhuuriyadda Federaalka Soomaaliya ayaa ku amray Taliska Ciidanka Xoogga Dalka in ay laba jibbaaraan howlgallada lagu ciribtirayo Shabaab, isla markaana la dardargeliyo dadaallada lagu casriyeynayo laguna horumarinayo Ciidanka Xoogga Dalka Soomaaliyeed.
Madaxweynaha ayaa adkeeyay muhiimadda ay leedahay in Ciidanka Xoogga Dalka Soomaaliyeed ay si buuxda u gutaan waajibaadkooda qaran ee difaaca dalka, sugidda amniga iyo ilaalinta shacabka Soomaaliyeed.
