Wasiirka Warfaafinta, Dhaqanka iyo Dalxiiska ee Dowladda Federaalka Soomaaliya, Mudane Cabdulfataax Qaasim Maxamuud, ayaa ku dhawaaqay in magaalada Muqdisho lagu qaban doono Madasha Qaran ee Isgaarsiinta Istiraatiijiga ah 2026, taas oo dhici doonta 7-da iyo 8-da September 2026.
Madasha oo halkudhig looga dhigay “Qaabaynta Mustaqbalka Warbaahinta Soomaaliya Xilliga Dijitaalka” ayaa diiradda lagu saari doonaa sidii loo casriyeyn lahaa waaxda warbaahinta Soomaaliya, loona horumarin lahaa adeegsiga tiknoolajiyadda iyo aaladaha cusub ee warbaahinta dijitaalka ah.
Sidoo kale, waxaa madasha lagu falanqeyn doonaa xoojinta wada-shaqeynta dowladda iyo warbaahinta, iyadoo la isla eegi doono sidii loo dhisi lahaa hannaan isgaarsiin oo wax-ku-ool ah, hufan, isla markaana la jaanqaadaya isbeddellada degdegga ah ee dunida warbaahinta.
Madashan ayaa sidoo kale la filayaa inay fursad u noqoto khubarada, hay’adaha dowladda, bahda warbaahinta iyo dhinacyada kale ee ay khusayso inay ka wada hadlaan istaraatiijiyadaha warbaahinta dijitaalka ah iyo mustaqbalka warbaahinta Soomaaliya.
Ujeeddada guud ayaa ah in la helo aragti qaran oo lagu horumarinayo warbaahinta Soomaaliyeed, iyadoo laga faa’iideysanayo fursadaha uu leeyahay xilligga dijitaalka ah.
