Guddoomiyaha Maxkamadda Sare ee Soomaaliya, Garyaqaan Baashe Yuusuf Axmed, ayaa magaalada Muqdisho ka daah-furay hannaanka lagu dhisayo Ururka Garsoorayaasha Jamhuuriyadda Federaalka Soomaaliya, iyadoo kulan wadatashi ah looga hadlay qabyo-qoraalka dastuurka lagu hagayo ururka.
Guddoomiyaha ayaa sheegay in ururkan loo dhisayo sidii loo xoojin lahaa madaxbannaanida garsoorka, loo dhowri lahaa ku dhaqanka sharciga, loona ilaalin lahaa karaamada, hufnaanta iyo sumcadda hay’adaha garsoorka dalka.
Sidoo kale, ururka ayaa diiradda saari doona horumarinta aqoonta iyo xirfadaha garsoorayaasha Soomaaliyeed, iyadoo la siinayo fursado ay ku kobcin karaan aqoontooda iyo waayo-aragnimadooda shaqo.
Waxaa kale oo ururka loo qorsheeyay inuu ka shaqeeyo ilaalinta xuquuqda garsoorayaasha, gaar ahaan amnigooda, xaaladdooda dhaqaale iyo daryeelkooda, si ay waajibaadkooda ugu gutaan si madax-bannaan oo hufan.
Kulanka Muqdisho ka dhacay ayaa ah qayb ka mid ah wadatashi ballaaran oo lagu doonayo in lagu dhameystiro dastuurka ururka.
Guddoomiye Baashe ayaa sheegay in wadatashiyada loo ballaarin doono garsoorayaasha ka howlgala dowlad-goboleedyada xubnaha ka ah Federaalka, ka hor inta aan la soo gabagabeyn dastuurka ururka.
Dhismaha ururkan ayaa imanaya xilli Soomaaliya ay waddo dadaallo lagu horumarinayo hay’adaha garsoorka iyo xoojinta madaxbannaanida garsoorka, taas oo muhiim u ah dhismaha dowladnimada, ku dhaqanka sharciga iyo helitaanka caddaalad loo siman yahay.
