Magaalada Baydhabo ee xarunta Gobolka Baay waxaa lagu qabtay kulan ballaaran oo lagu muujinayay taageero, bogaadin iyo dhiirrigelin loo jeediyay Ciidamada iyo laamaha amniga Dowladda Koonfur Galbeed, kuwaas oo guulo ka soo hooyay dagaalladii ay la galeen kooxihii weerarka ku soo qaaday magaalada baydhaba iyo duleedkeeda ka dhacay.
Kulanka waxaa ka qeybgalay Wasiirka Wasaaradda Amniga Dowladda Koonfur Galbeed, Mudane Isxaaq Maxamed Isxaaq (Korsaar), wasiirro ka tirsan xukuumadda Koonfur Galbeed, iyo mas’uuliyiin heer gobol iyo degmo ah.
Mas’uuliyiintii kulanka ka hadlay ayaa si weyn u bogaadiyay ciidamada, iyagoo ku ammaanay dadaallada ay ku xaqiijinayaan amniga iyo difaaca shacabka. Waxaa sidoo kale ciidamada loo jeediyay fariimo dhiirrigelin iyo garab istaag ah, iyadoo bulshada loogu baaqay inay la shaqeeyaan hay’adaha amniga.
Kulanka ayaa sidoo kale lagu qabtay wacyigelin ku saabsan muhiimadda ay leedahay xoojinta amniga, ilaalinta shacabka iyo wada-shaqeynta ciidamada iyo bulshada, gaar ahaan xilliyada ay jiraan xaalado amni oo adag.
Mas’uuliyiinta ayaa adkeeyay in guulaha laga gaaray dagaallada ay qeyb ka yihiin dadaallada lagu xaqiijinayo nabadda iyo xasilloonida Baydhabo iyo guud ahaan deegaannada Koonfur Galbeed.
Kulankan ayaa kusoo beegmaya xilli ciidamada Dowladda Koonfur Galbeed ay wadaan howlgallo iyo dadaallo lagu sugayo amniga, iyadoo shacabka magaalada Baydhabo ay muujinayaan taageero ay u hayaan ciidamada ku howlan difaaca deegaanka.
