Mas’uuliyiin ka tirsan dowladda federaalka Soomaaliya ayaa lagu soo warramayaa inay ka fiirsanayaan tallaabooyin dhaqaale iyo kuwo socdaal oo ballaaran oo lagu beegsanayo madaxweynihii hore Koonfur Galbeed xilka iska casilay , Cabdicasiis Xasan Maxamed Laftagareen, iyo qaar ka mid ah xulafadiisa siyaasadeed ee ugu dhow.
Xog aan helnay ayaa sheegeysa in tallaabooyinka la qorsheynayo ay ka mid yihiin in la xannibo hantida gaarka ah iyo akoonnada bangiyada ee Laftagareen, iyo sidoo kale dhaqaalaha iyo akoonnada ay leeyihiin shaqsiyaad ama hay’ado lala xiriirinayo maamulkiisii hore
Sidoo kale, mas’uuliyiinta federaalka ayaa la sheegay inay diyaarinayaan magacyada siyaasiyiin iyo shaqsiyaad kale oo sare oo ka tirsan garabka Laftagareen, si loogu gudbiyo hay’adaha socdaalka
Haddii tallaabooyinkan la dhaqan-geliyo, waxaa suurta-gal ah in shaqsiyaadkaasi laga xaddido safarrada, lagana joojiyo ama laga laalo baasaboorrada iyo dokumentiyada kale ee safarka ee ay haystaan
Sida aan xogta ku helnay, mas’uuliyiin sare oo dowladda federaalka ah ayaa arrintan kala hadlay hay’ado ay ka mid yihiin Wasaaradaha Maaliyadda iyo Amniga Gudaha, Booliska Soomaaliyeed, Hay’adda Socdaalka iyo Jinsiyadda, iyo Guddiga Qaranka ee La-dagaallanka Lacagdhaqidda.
Haddii xayiraadaha la qorsheynayo la ansixiyo, waxay noqon doonaan tallaabadii ugu cusleyd ee dowladda federaalka ku beegsato Laftagareen iyo xulafadiisa tan iyo markii uu lumiyey gacan-ku-haynta Baydhaba, waxayna khilaafka Koonfur Galbeed u sii gudbin karaan marxalad cusub oo ay isku biiraan cadaadis siyaasadeed, mid dhaqaale iyo mid amni.
