BAYDHABO — Wariye Bashiir Maxamed Cabdullaahi, oo ka tirsanaa Arlaadi Media Network, ayaa geeriyooday kadib markii uu u geeriyooday dhaawac culus oo ka soo gaaray dagaalladii magaalada Baydhabo ka dhacay 3-dii Sebtembar 2026.
Bashiir oo ahaa 24 jir, ayaa lagu dhaawacay rasaas xilli ay magaalada Baydhabo ka socdeen iska horimaadyo u dhexeeyay ciidamada dowladda federaalka iyo xoogag daacad u ah madaxweynihii hore ee Koonfur Galbeed, Cabdicasiis Xasan Maxamed Laftagareen.
Sida ay hore u xaqiijiyeen ilo caafimaad iyo Ururka Suxufiyiinta Soomaaliyeed (SJS), Bashiir ayaa laba xabbadood kaga dhacay dhabarka, kuwaas oo gudaha uga gudbay dhinaca caloosha. Waxaa si degdeg ah loogu qaaday Isbitaalka Guud ee Gobolka Bay, halkaas oo dhakhaatiirtu ay qalliin degdeg ah ku sameeyeen.
Xaaladdiisa ayaa ahayd mid aad u liidatay, waxaana la sheegay inuu ku jiray xaalad miyir-beel ah. Qoyskiisa ayaa sidoo kale qorsheynayay in loo qaado Muqdisho si loogu sii daweeyo, balse dhaawaca culus ee soo gaaray ayaa ugu dambeyn sababay geeridiisa.
Geerida Bashiir waxay kusoo beegmaysaa xilli dagaalladii Baydhabo ay sababeen dhaawaca dad badan oo rayid ah. SJS ayaa hore u cambaareysay toogashada dadka rayidka ah iyo dhaawaca soo gaaray wariyaha, iyadoo Bashiir uu ka mid ahaa dadka waxyeelladu kasoo gaartay iska horimaadyada.
Bashiir Maxamed Cabdullaahi wuxuu ahaa wariye ka shaqeynayay warbaahinta Arlaadi Media Network, waxaana geeridiisu mar kale soo bandhigtay khatarta ay suxufiyiintu wajahayaan marka ay ka howlgalaan goobaha ay ka jiraan colaadaha iyo iska horimaadyada hubeysan.
Dhanka kale Wasiirka Warfaafinta Koonfur Galbeed, bahda saxaafadda soomaaliyeed iyo tan koonfur galbeed, urarada saxaafada oo ka tacsiyeeyay geerida Wariye Bashiir oo ku geeryooday isbitaalka bay regional hospital magaalada Baydhabo.
Wasiirka Warfaafinta, Dhaqanka iyo Dalxiiska ee Koonfur Galbeed Soomaaliya, iyo xubno ka tirsan bahda saxaafadda Soomaaliyeed ayaa tacsi tiiraanyo leh ka diray geerida ku timid Wariye Bashiir Maxamed Cabdullaahi, oo ku geeriyooday dhaawac kasoo gaaray shaqaaqadii ka dhacday magaalada Baydhabo.
Wasiirka iyo bahda warbaahinta ayaa sheegay in geerida Wariye Bashiir ay tahay khasaare weyn oo soo gaaray qoyskiisa, bahda saxaafadda iyo guud ahaan bulshada Soomaaliyeed, iyagoo xusay doorkii uu ku lahaa gudashada waajibaadkiisa shaqo iyo u adeegidda bulshada..
Warsan Radio waxay tacsi u direysaa qoyska, ehelada, asxaabta iyo bahda saxaafadda Soomaaliyeed ee uu ka baxay marxuum Bashiir Maxamed Cabdullaahi. Ilaahay ha u naxariisto, ehelkiisana samir iyo iimaan haka siiyo.
Aamiin Aamiin .
إِنَّا لِلَّهِ وَإِنَّا إِلَيْهِ رَاجِعُونَ
