Wasiirka Haweenka iyo Xuquuqul Insaanka Dowladda Koonfur Galbeed Soomaaliya, Marwo Sahara Cumaan Axmed, iyo Guddoomiyaha Gobolka Shabeellaha Hoose, Mudane Cabdifataax Sayid Axmed Siidii, ayaa degmada Afgooye kulan kula qaatay Odayaasha Dhaqanka ee degmada.
Kulanka ayaa diiradda lagu saaray xaaladda guud ee degmada Afgooye, doorka Odayaasha Dhaqanka ee bulshada iyo arrimaha muhiimka ah ee khuseeya nabadda, xasilloonida iyo wadajirka bulshada.
Odayaasha Dhaqanka ayaa mas’uuliyiinta u gudbiyay warbixin ku saabsan xaaladda bulshada degmada, doorka dhaqanka iyo kaalinta ay ku leeyihiin nabadeynta iyo xalinta arrimaha bulshada.
Sidoo kale, Guddoomiyaha Maxkamadda Degmada Afgooye ayaa kulanka ka bixisay warbixin ku saabsan xaaladda maxkamadda iyo howlaha garsoorka.
Waxay sheegtay in maxkamaddu si joogto ah uga shaqeyso gudashada waajibaadkeeda garsoor, ilaalinta caddaaladda iyo xalinta dacwadaha bulshada.
Guddoomiyaha Gobolka Shabeellaha Hoose, Cabdifataax Sayid Axmed Siidii, ayaa Wasiirka Haweenka iyo Xuquuqul Insaanka warbixin guud ka siiyay xaaladda gobolka, doorka Odayaasha Dhaqanka iyo arrimaha muhiimka ah ee bulshada.
Dhankeeda, Wasiiradda Haweenka iyo Xuquuqul Insaanka, Sahara Cumaan Axmed, ayaa bogaadisay warbixinnadii laga dhageystay kulanka, iyadoo xustay muhiimadda ay Odayaasha Dhaqanka u leeyihiin nabadda, xasilloonida, wadajirka iyo xalinta khilaafaadka bulshada.
Kulanka waxaa sidoo kale goobjoog ka ahaa Guddoomiyaha Ururka Haweenka Gobolka Shabeellaha Hoose, Marwo Maryama Wiilo, maamulka degmada Afgooye iyo Guddoomiyaha Maxkamadda Degmada Afgooye.
Kulankan ayaa kusoo beegmaya xilli maamulka Koonfur Galbeed uu degmada Afgooye iyo guud ahaan Gobolka Shabeellaha Hoose ka wado kulamo iyo wadatashi lala yeelanayo qaybaha kala duwan ee bulshada.
