Dowladda Soomaaliya ayaa sannadkii 2025 qaad ku soo dejisay lacag dhan $450.4 milyan, taas oo ka badan $404.3 milyan oo dowladda federaalku ka heshay dakhliga gudaha isla sannadkaas, sida lagu sheegay warbixinta Golaha Dhaqaalaha Qaranka.
Warbixinta xaaladda dhaqaalaha Soomaaliya ee 2026, oo uu goluhu diyaariyey, ayaa qaadka ku dartay badeecadaha ugu waaweyn ee dalka dibadda uga soo dego, iyadoo xogta laga soo xigtay Bangiga Dhexe ee Soomaaliya.
Cuntada ayaa ahayd badeecadda ugu badan ee la soo dejiyo, iyadoo qiimaheedu gaaray $2.4 bilyan. Waxaa ku xigay agabka dhismaha, dawooyinka, dharka iyo kabaha, shidaalka iyo gaaska, iyo baabuurta iyo agabka dayactirkooda.
Lacagta qaadka lagu soo dejiyey ayaa sidoo kale u dhiganta ku dhowaad kala bar dakhliga $922.9 milyan ah ee Soomaaliya ka heshay dhoofinta xoolaha nool, oo ah badeecadda ugu weyn ee dalka dibadda loo iib geeyo.Dhanka kale, lacagta qaadka lagu soo dejiyey ayaa ku dhowaad 13 jeer ka badan dakhliga Soomaaliya ka heshay dhoofinta kalluunka, oo warbixintu ku sheegtay $34.9 milyan.
Qaadka Kenya, oo loo yaqaan miraa, ayaa ah nooca ugu badan ee Soomaaliya la keeno, waxaana dalka lagu soo gaarsiiyaa diyaarado.
Wasiirka Beeraha Kenya, Mutahi Kagwe, ayaa baarlamaanka dalkiisa u sheegay bishii Diseembar 2025 in Kenya ay Soomaaliya maalin kasta u dhoofiso inta u dhexeysa 13 iyo 17 tan oo miraa ah.
Saraakiisha Kenya ayaa sidoo kale sheegay in in ka badan 17 milyan oo kiiloogaraam oo qaad ah loo dhoofiyey Soomaaliya tan iyo markii dib loo furay suuqan bishii Luulyo 2022.
Soomaaliya ayaa lagu qiyaasay inay qaadato inta u dhexeysa 80 iyo 90 boqolkiiba ganacsiga miraa ee Kenya, taas oo muujinaysa muhiimadda uu suuqa Soomaaliya u leeyahay dhoofinta qaadka ee dalkaas.
Itoobiya ayaa iyaduna kula tartanta Kenya suuqa qaadka Soomaaliya.
Hase yeeshee, dhoofinta qaadka Itoobiya ee Soomaaliya ayaa hoos u dhacday 35 boqolkiiba rubucii koowaad ee sannad-maaliyadeedka Itoobiya ee 2025/2026, iyadoo gaartay 2,580 tan, marka loo eego isla muddada sannadkii ka horreeyey.
Soomaaliya ayaa xilliyo kala duwan mamnuucday ama xaddiday qaadka uga yimaada mid ka mid ah labada dal, iyadoo tallaabooyinkaas ay la xiriireen xiisadaha siyaasadeed.
Sannadkii 2024 ayay Soomaaliya joojisay qaadkii Itoobiya uga imaan jiray, xilli uu sii xoogeysanayey khilaafka labada dal.
Inkasta oo qaadku yahay badeecad dibadda laga keeno, haddana wuxuu dowladda Soomaaliya u soo xareeyaa dakhli canshuureed.
Warbixinta Golaha Dhaqaalaha Qaranka ayaa sheegtay in qaadku ka mid yahay badeecadaha ugu waaweyn ee laga qaado canshuuraha kastamka.
