Wasiirka Warfaafinta, Dhaqanka iyo Dalxiiska Soomaaliya, Mudane Cabdulla Fataax Maxamed Qaasim, ayaa kulan la yeeshay guddi-hoosaadka Golaha Shacabka ee u qaabilsan Warfaafinta, Wacyigelinta Dadweynaha, Dhaqanka, Dalxiiska, Boostada iyo Isgaarsiinta.
Kulanka ayaa diiradda lagu saaray qorshaha shaqo ee Wasaaradda Warfaafinta, iyo tallaabooyinka ay wasaaraddu waddo ee ku saabsan diyaarinta iyo horumarinta xeerarka iyo shuruucda la xiriira howlaha wasaaradda.
Sidoo kale, waxaa kulanka looga hadlay qorshayaasha lagu casriyeynayo howlaha warfaafinta iyo sidii loo horumarin lahaa hababka wacyigelinta iyo adeegyada warbaahineed ee dalka.
Guddiga Golaha Shacabka ayaa Wasiirka kala hadlay muhiimadda ay leedahay in qorshayaasha iyo xeerarka la diyaarinayo ay noqdaan kuwo taageera horumarinta hay’adaha warbaahinta iyo adeegyada isgaarsiinta, iyadoo la xoojinayo wada-shaqeynta u dhexeysa Wasaaradda iyo Baarlamaanka.
Kulankan ayaa qeyb ka ah dadaallada lagu xoojinayo wada-shaqeynta hay’adaha dowladda iyo Golaha Shacabka, gaar ahaan arrimaha la xiriira warfaafinta, dhaqanka, dalxiiska iyo isgaarsiinta.
