Magaalada cusub ee Al-Calamayn ee dalka Masar ayaa maanta oo Axadda martigelinaysa shir wadatashi ah oo ay isugu imanayaan madaxda Masar, Eritrea, Sudan iyo Soomaaliya, iyadoo ajandaha kulanka lagu wadaa inuu diiradda saaro xaaladda amni iyo siyaasadeed ee Geeska Afrika iyo Badda Cas.
Shirka waxaa ka qeybgalaya Madaxweynaha Masar Cabdel Fataax Al-Sisi, Madaxweynaha Eritrea Isaias Afwerki, Madaxweynaha Golaha Madaxbannaanida Sudan Cabdel Fataax Al-Burhaan, iyo Madaxweynaha Soomaaliya Xasan Sheekh Maxamuud.
Mas’uuliyiinta Masar ayaa sheegay in kulanka uu qeyb ka yahay wadatashi iyo isku-dubarid ku saabsan arrimaha gobolka ee ay afarta dal dan wadaag ka leeyihiin, inkastoo aan weli si faahfaahsan loo shaacin ajandaha rasmiga ah ee shirka.
Arrinta Sudan ayaa la filayaa inay kamid noqoto qodobada ugu muhiimsan ee madaxdu ka wada hadlaan, xilli dagaalka u dhexeeya Ciidamada Suudaan iyo Ciidamada Taageerada Degdegga ah (RSF) uu weli ka socdo dalkaas.
Masar, Eritrea iyo Soomaaliya waxay xiriir dhow la leeyihiin Sudan, halka dagaalka dalkaasi uu saameyn ku yeelanayo amniga xuduudaha, ganacsiga iyo xasilloonida guud ee gobolka.
Shirka ayaa sidoo kale kusoo beegmaya xilli xiisaddu ay ka dhex taagan tahay Itoobiya iyo Eritrea, iyadoo dagaallo cusub ay ka qarxeen waqooyiga Itoobiya.
Xaaladda Itoobiya ayaa kamid noqon karta arrimaha gobolka ee miiska saaran, gaar ahaan kadib markii uu sii xumaaday xiriirka Addis Ababa iyo Asmara.
Dhinaca kale, xiisado siyaasadeed iyo kuwo amni ayaa u dhexeeya Itoobiya iyo dalal kale oo gobolka ah, iyadoo Addis Ababa ay hore ugu eedeysay Masar, Eritrea iyo Sudan inay taageerayaan isbahaysi ka dhan ah dowladda Itoobiya. Dalalkaasi ayaa eedeymahaas iska fogeeyay.
Masar ayaa dhankeeda ku celcelisay in khilaafaadka gudaha Itoobiya ay yihiin arrimo gudaha ah, iyadoo dhinacyada gobolka iyo kuwa caalamiga ah ugu baaqay in laga fogaado tallaabo kasta oo sii kordhin karta xiisadda.
Amniga Badda Cas ayaa sidoo kale ah arrin muhiim ah oo la filayo in madaxdu ka wada hadlaan.
Masar, Sudan iyo Eritrea waxay si toos ah u leeyihiin xeebaha Badda Cas, halka Soomaaliya ay ku taallo meel istiraatiiji ah oo ku dhow Gacanka Cadmeed iyo marin-biyoodka Bab Al-Mandab.
Arrintan ayaa Soomaaliya siinaysa door muhiim ah marka laga hadlayo amniga marinnada maraakiibta iyo xasilloonida gobolka.
Masar, Eritrea iyo Soomaaliya ayaa horey uga wada hadlay amniga Badda Cas iyo Bab Al-Mandab, iyadoo shir saddex geesood ah oo ka dhacay Asmara sanadkii 2024 lagu adkeeyay muhiimadda ay leedahay ilaalinta madax-bannaanida dalalka gobolka iyo xoojinta iskaashiga amniga.
Ka qeybgalka Madaxweyne Xasan Sheekh ee shirka ayaa sidoo kale kusoo beegmaya xilli xiriirka Muqdisho iyo Qaahira uu sii xoogeysanayo, gaar ahaan dhinacyada siyaasadda, amniga iyo taageerada hay’adaha dowladda Soomaaliya.
Soomaaliya waxay sidoo kale muhiimad gaar ah siisaa amniga xeebaha iyo biyaha dhuleed, iyadoo goobta ay ku taallo ay ka dhigeyso dal muhiim u ah amniga Gacanka Cadmeed iyo marinnada isku xira Badda Cas iyo Badweynta Hindiya.
Kulanka afarta dal ayaa dhacaya xilli Geeska Afrika uu wajahayo isku-dar ah dagaallo, xiisado siyaasadeed iyo loollan amni oo gobolka ka socda.
Inkasta oo aan Qaahira aysan shaacin in shirka looga gol leeyahay dhismaha isbahaysi cusub oo ka dhan ah dal gaar ah, haddana kulanka madaxda Soomaaliya, Masar, Sudan iyo Eritrea wuxuu muujinayaa muhiimadda sii kordheysa ee iskaashiga gobolka.
Waxaa la filayaa in hadallada madaxda iyo war-murtiyeedka kasoo baxa shirka ay iftiimiyaan mowqifyada afarta dal ee ku aaddan dagaalka Sudan, xiisadda Itoobiya iyo Eritrea, iyo amniga Badda Cas iyo Gacanka Cadmeed.
