Dowladda Soomaaliya iyo boqortooyada Sacuudiga carabiya oo ka wada hadlay xoojinta iskaashiga dhanka warbaahinta, dhaqanka iyo dalxiiska guud labada dal.

Muqdisho — Wasiirka Wasaaradda Warfaafinta, Dhaqanka iyo Dalxiiska Xukuumadda Federaalka Soomaaliya, Cabdifitaax Qaasim Maxamuud, ayaa maanta xafiiskiisa ku qaabilay Safiirka Boqortooyada Sacuudi Carabiya u fadhiya Soomaaliya, Axmed Bin Maxamed Al-Muwallad, iyaga oo ka wada hadlay xoojinta iskaashiga labada dal, gaar ahaan dhinacyada warbaahinta, dhaqanka iyo dalxiiska.

Kulanka ayaa si gaar ah diiradda loogu saaray horumarinta baahinta warbaahinta, xoojinta iskaashiga warbaahineed iyo kobcinta barnaamijyada ku baxa afka Carabiga.

Wasiirka iyo Safiirka ayaa sidoo kale kormeer ku sameeyay xarumaha warbaahinta Qaranka, oo ay ka mid yihiin Telefishinka Qaranka Soomaaliyeed, Wakaaladda Wararka Soomaaliyeed ee SONNA, Radio Muqdisho iyo kaydka taariikhiga ah ee Radio Muqdisho.

Intii uu kulanku socday, Wasiir Cabdifitaax Qaasim Maxamuud ayaa uga mahadceliyay Dowladda Boqortooyada Sacuudi Carabiya taageerada ay siiso Dowladda Federaalka Soomaaliya iyo shacabka Soomaaliyeed.

Dhankiisa, Safiirka Sacuudiga ee Soomaaliya, Axmed Bin Maxamed Al-Muwallad, ayaa sheegay in dowladdiisu ay sii wadi doonto taageerada ay la garab taagan tahay Soomaaliya iyo shacabkeeda.

Kulankan ayaa qayb ka ah dadaallada lagu xoojinayo xiriirka diblomaasiyadeed iyo iskaashiga u dhexeeya Soomaaliya iyo Sacuudi Carabiya, iyadoo la doonayo in la ballaariyo wada-shaqeynta labada dhinac, gaar ahaan horumarinta warbaahinta, dhaqanka iyo dalxiiska.