Baydhabo(WSR)-Madaxweynaha Dowladda Koonufur galbeed ee Soomaaliya Mudane Shariif Xasan Sheekh Aadan oo maanta dib ugu laabtay magaalada Baydhabo ayaa tilmaamay inay guul ku soo dhamaatay shirar kala duwan oo uu kaga qeyb galay magaalooyinka Muqdisho iyo Kismaayo ee gobollada Banaadir iyo Jubbada Hoose.
Wafdiga uu hogaaminayay Madaxweyne Shariif Xasan Sheekh Aadan waxaa qeyb ka ahaa qaar ka mid ah Wasiirada Dowladda Koonfur galbeed, waxaana garoonka diyaaradaha ku soo dhaweeyay xubno ka tirsan Wasiirada KGS , saraakiisha ciidamada qalabka sida ee Soomaaliya, kuwa AMISOM, Maamulka gobolka iyo dadweyn aad u fara badan oo ku labisnaa dharka hidaha iyo dhaqanka.
Madaxweynaha Dowladda Koonufur galbeed ee Soomaaliya
Mudane Shariif Xasan Sheekh Aadan oo warbaahinta kula hadlay Madaxtooyada KGS ayaa sheegay in ay guul ku soo idlaatay socdaalkii uu ku tegay Kismaayo iyo Muqdisho, isagoo xusay in bulshada looga baahanyay in ciidamada ay gacan ku siiyaan sidii guud ahaan dalka looga cirib tiri lahaa kooxda Mayalka adag ee Al-Shabaab.
“Caleemo saarka Madaxweynaha Mamaulka Jubbaland Axmed Madoobe ayaan ka qeyb galay, waxaan ka wada hadalnay arrimo badan oo aan isla garanay, waxaan kaloo ka qeyb galay shir looga hadlayay sidii loo heli lahaa hab ay ku dhici karto doorashada 2016-ka, cadowga ugu daran Soomaaliya waa Al-Shabaab, kuwaasi oo aan doonayn in horumr la gaaro, ee aan u wada istaagno sidii kuwaasi dalka looga xoreyn lahaa”ayuu yiri Shariif Xasan.
Wariye Cali ilyaas Baydhaba janaay
