Mid ka mid ah odeyaasha dhaqanka ee gobolka Sool ayaa ku eedeeyay dowladda Soomaaliya inay Somaliland garab ku siinayso duqeynta ay ka wado dhowrkii Bilood ee la soo dhaafay Magaalada Laascaanood.Garaad Jaamac Garaad Ismaaciil ayaa hadalkan ka sheegay xaflad lagu qabtay Nayroobi xalay, isaga oo si gaar ah u tilmaamay madaxweyne Xasan Sheekh iyo Raysal wasaare Xamsa Cabdi Barre.“Xukuumadda maanta jirta, afka ka dhowri mayno, waxaan ognahay oo isa soo taraya in iyadu garab ku siinayso Somaliland duqeynta Laascaanood,” ayuu yiri Garaadka.Dowladda federaalka ah weli kama falcelin eedeynta loo jeediyay. Horey se, waxay dhowr mar ugu baaqday wada-hadal iyo xabad-joojin, iyada oo madaxweyne Xasan Sheekh kula kulmay Muqdisho qaar ka mid ah odeyaasha dhaqanka Sool.
