Dagaal u dhexeeyay ciidamo ka tirsan kuwa Midowga Afrika ee ATMIS gaar ahaan uga Uganda iyo dagaalamayaasha Al-Shabaab ayaa xalay ka dhacay gudaha magaalada Buulo-mareer ee Gobolka Shabeellaha Shabeellaha Hoose.
Wararka la helayo ayaa sheegaya in dagaalka dhexmaray labada dhinac uu markii hore ka bilowday weerar gaadmo ah oo dagaalyahanada Al-Shabaab ay xalay kusoo qaaday Saldhiga ciidanka ATMIS ay ku leeyihiin magaalada Buulo-mareer.
Khasaaro ayaa lasoo weriyay inuu dagaalka ka dhashay, inkastoo aan faah faahin intaas ka dheeraad ah aan laga helin, balse dadka deegaanka ayaa soo sheegaya inuu jiro khasaaro kala duwan oo dhinacyada kala gaaray.
Ciidanka ATMIS iyo kuwa ciidanka dowladda Federaalka ayaa saaka howlgalo lagu xaqiijinayo amniga ka wada magaalada Buulo-mareer ee Gobolka Shabeellaha Hoose, waxaana xaalada haatan ay tahay mid dagan, kadib weerarkii iyo dagaalkii dhacay.
Si kastaba, Al-Shabaab bishii May ee sanadkaan 2023 weerar lagu laayay Askar farabadan oo kamid ah kuwa ATMIS ee ka socda Uganda ku qaaday saldhiga ay ciidankaasi ku lahaayeen Buulo-mareer, waxaana weerarkaasi lagu qabsaday gaadiid badan.
