Madaxweynihii hore ee Soomaaliya Maxamed Cabdullaahi Farmaajo ayaa si adag u cambaareeyay qorshaha uu wado Madaxweynaha Soomaaliya Xasan Sheekh Maxamuud, kaas oo ah in Madasha Wadatashiga Qaran loo beddelo aalad siyaasadeed oo gaar ah oo u adeegi doonta danaha xisbi gaar ah halkii ay ka ahaan lahayd madal qaran oo isu keenta madaxda dowladda dhexe iyo kuwa dowlad-goboleedyada si ay uga wadatashadaan arrimaha dalka u taagan.
Madaxweyne Farmaajo wuxuu si cad u sheegay in damaca siyaasadeed ee lagu wado in lagu qabsado doorasho hal dhinac ah, iyadoo la adeegsanayo guddi doorasho oo aan sharciyad iyo kalsooni qaran midna haysan, uu yahay mid si cad ugu xadgudbaya dastuurka kumeel gaarka ah ee dalka iyo heshiisyadii siyaasadeed ee horey loo gaaray, isla markaana horseedi kara burbur siyaasadeed iyo kala shaki ku yimaada hay’adaha dowladda iyo shacabka Soomaaliyeed.
“Qorshaha uu wado Madaxweyne Xasan Sheekh Maxamuud waa mid mugdi gelinaya hannaanka dowlad-dhisidda, dimuqraadiyadda iyo midnimada qaran ee Soomaaliyeed. Ma aqbali karno doorasho hal dhinac ah oo laga hor istaagay shacabkii Soomaaliyeed iyo madaxda dowlad-goboleedyada in ay door muuqda ku yeeshaan,” ayuu yiri Madaxweyne Farmaajo.
Madaxweynuhu wuxuu ugu baaqay Madaxweyne Xasan Sheekh in uu ka fogaado ficillo siyaasadeed oo dalka gelin kara xaalad qalalaase ah, isla markaana uu waqtiga ka haray xafiiskiisa ku bixiyo fulinta waajibaadka qaran ee hortiisa yaalla, sida la-dagaalanka argagixisada, dib-u-heshiisiinta, dib-u-dhiska hay’adaha dowlad-goboleedyada ka maqan Madasha Wadatashiga, iyo qabashada shirar qaran oo sal u noqon kara dhameystirka nidaamka federaalka.
Sidoo kale, Madaxweyne Farmaajo wuxuu ugu baaqay madaxda dowlad-goboleedyada Galmudug, Koonfur Galbeed, Hirshabeelle, SSC-Khaatumo iyo Guddoomiyaha Gobolka Banaadir in ay garwaaqsadaan mas’uuliyadda ka saaran ilaalinta midnimada iyo maslaxadda dalka, ayna ka feejignaadaan ka mid noqoshada hannaan siyaasadeed iyo xisbi lagu dhisay sharci-darro, kaas oo wiiqi kara dowladnimada iyo kalsoonida shacabka.
“Mas’uuliyad ayaa naga saaran dhammaanteen in aan ilaalino hannaanka siyaasadeed ee loo dhanyahay, lagana fogaado wax kasta oo dib u dhac u keeni kara dowlad-dhiska Soomaaliya. Qofna ma aha milkiilaha dalka, dalkuna waa ka dhaxeeya dhammaan ummadda Soomaaliyeed,” ayuu yiri Farmaajo.
Madaxweynihii hore ayaa ugu dambeyn ku baaqay in la ilaaliyo hannaanka siyaasadeed ee lagu dhisay wadatashi, kalsooni iyo sharciyad, si looga hortago burburka siyaasadeed iyo fursad siinta kooxaha cadowga ku ah jiritaanka dowladnimada Soomaaliyeed.
