Madasha Samata-bixinta Mucaaradka oo ay ku mideysan yihiin musharaxiinta Madaxweynaha ee mucaaradka ah, ayaa si rasmi ah u soo dhoweysay gogosha siyaasadeed ee uu fidiyay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud.
Madashu waxa ay gogoshaas u aragtaa fursad muhiim u ah xasilinta iyo samata-bixinta dalka, balse waxa ay soo bandhigtay saddex shardi oo aas-aasi ah si wadahadalladaasi u noqdaan kuwo miro dhal ah:
1. In la caddeeyo ajandaha iyo qodobada laga hadlayo, si loo helo hufnaan iyo is-aaminaad.
2. In gogosha noqoto mid xal waara looga gaarayo khilaafka siyaasadeed ee taagan.
3. In gogosha noqoto mid furan oo ay ka qeyb galaan dhammaan dhinacyada siyaasadeed, mucaarad iyo muxaafidba.
Madasha waxa ay mar kale adkeyneysaa go’aankeeda ah in ay u taagan tahay badbaadinta dalka, ilaalinta dowladnimada iyo horumarka Soomaaliya. Waxa ay sidoo kale diyaar u tahay in ay ka qeyb qaadato wadahadal dhab ah oo horseedi kara midnimo qaran, nabad, iyo dowladnimo ku dhisan hufnaan iyo wada-tashi.
