Dowladda Federaalka Soomaaliya ayaa markii ugu horreysay tallaabo sharci ah ka qaaday diyaarado lagu helay inay buuxin waayeen shuruudaha nidaamka duulista ee dalka, ka dib baaritaanno lagu sameeyay.
Go’aankan ayaa lagu shaaciyay kulan ay maanta yeesheen Golaha Wasiirrada Xukuumadda Federaalka Soomaaliya, iyadoo Golaha ay warbixin dhameystiran ka dhageysteen Wasaaradda Gaadiidka iyo Duulista Hawada.
Diyaaradaha shaqada laga joojiyay ayaa la tilmaamay inay jabiyeen xeerarka badqabka ee loogu talagalay ilaalinta nafta rakaabka iyo shaqaalaha.
Sidoo kale, Wasaaradda Gaadiidka ayaa xustay in loo saaray guddi gaar ah oo baaritaan dheeraad ah ku sameeya, talona ka bixiya xaaladda guud ee diyaaradaha ka hawlgala gudaha Soomaaliya.
In kasta oo ay dowladdu xaqiijisay tallaabadan, haddana weli si rasmi ah looma shaacin magacyada shirkadaha iska leh diyaaradaha shaqo-joojinta lagu sameeyay.
Tallaabadan ayaa ku soo aadaysa xilli uu sii kordhayay walaaca laga qabo badqabka diyaaradaha u kala goosha gobollada dalka.
10-kii bishan Febraayo, diyaarad rakaab ah oo ka kacday magaalada Muqdisho, kuna sii jeedda Gaalkacyo, ayaa ku dhacday agagaarka xeyndaabka xerada Xalane ka dib markii ay soo wajahday cillad farsamo.
Inkasta oo ay diyaaraddaas burburtay, haddana waxaa nasiib-wanaag ka badbaaday dhammaan rakaabkii iyo shaqaalihii saarnaa.
