Guddiga Xuquuqul Insaanka, Haweenka iyo Arrimaha Bani’aadanimada ee Golaha Shacabka Baarlamaanka Jamhuuriyadda Federaalka Soomaaliya ayaa maanta kulan ku yeeshay Xarunta Guddoonka iyo Guddiyada ee Villa Hargeysa, iyadoo kulanka uu shir guddoomiyay Guddoomiye Ku-xigeenka Guddiga, Xildhibaan Xirsi Aadan Rooble.
Kulanka ayaa diiradda lagu saaray shuruucda hortaalla guddiga inta lagu guda jiro Kalfadhiga 8-aad, qorshayaasha shaqo ee guddiga iyo sidii loo dardargelin lahaa howlaha sharci-dejinta ee la xiriira xuquuqul insaanka, haweenka iyo arrimaha bani’aadanimada.
Ugu horreyn, Guddoomiye Ku-xigeenka Guddiga ayaa xubnaha la wadaagay warbixin ku saabsan shuruucda hortaalla guddiga iyo qorshayaasha kale ee loo dejiyey muddada kalfadhigan. Xubnaha guddiga ayaa sidoo kale ka wada hadlay muhiimadda ay leedahay in si hufan loo maro geeddi-socodka dib-u-eegista iyo diyaarinta shuruucda mudnaanta u leh ilaalinta iyo horumarinta xuquuqda aadanaha.
Guddigu wuxuu isku raacay in la dardargeliyo dib-u-eegista iyo diyaarinta shuruucda muhiimka ah, iyadoo la hubinayo in howlaha sharci-dejintu ay noqdaan kuwo si wanaagsan uga jawaabaya baahiyaha bulshada iyo xaaladaha bani’aadamnimo ee dalka.
Sidoo kale, guddigu wuxuu ansixiyey jadwalka kulamadiisa iyo qorshaha wada-shaqeynta hay’adaha dowladda, gaar ahaan wasaaradaha iyo hay’adaha ay khuseeyaan shuruucda hortaalla guddiga.
Qorshaha wada-shaqeynta ayaa sidoo kale ku saleysan xoojinta la xisaabtanka hay’adaha ay khuseyso, si loo hubiyo in waajibaadka dastuuriga ah iyo kuwa sharciyeed ee la xiriira xuquuqul insaanka, haweenka iyo arrimaha bani’aadanimada loo fuliyo si hufan.
Kulankan ayaa qeyb ka ah dadaallada Golaha Shacabka ee lagu dardargelinayo howlaha sharci-dejinta iyo kormeerka dowladda, iyadoo guddiyada baarlamaanku ay door muhiim ah ku leeyihiin dib-u-eegista shuruucda, la xisaabtanka hay’adaha dowladda iyo ilaalinta danaha shacabka Soomaaliyeed.
