Muqdisho, 16 Agoosto 2026 – Gudoomiyaha cusub baarlamaanka Federaalka Soomaaliya, Cabdulqaadir Maxamed Nuur (Jaamac), ayaa sheegay inuu dadaal ugu jiro sidii xal looga gaari lahaa tabashooyinka ay qabaan qaar ka mid ah xildhibaannada saaxiibbadiis ah.
Cabdulqaadir Maxamed Nuur oo qoraal uu soo dhigay baraha bulshada kaga hadlay arrintan ayaa sheegay in maanta uu xafiiskiisa ku qaabilay guddi ay soo wakiisheen xildhibaannada tabashada qaba, iyadoo kulanka looga hadlay sidii khilaafka jira loogu xallin lahaa wada-hadal, is-qancin iyo isu-tanaasul.
Gudoomiyaha ayaa xusay in ay ka go’an tahay in tabasho kasta oo xal loo heli karo aan loo oggolaan inay sii dheeraato sababo la xiriira farsamo-xumo, isagoo carrabka ku adkeeyay muhiimadda midnimada, wadajirka iyo ilaalinta danta dalka iyo dadka.
“Waxaanan iga go’an in tabasho kasta oo xal loo heli karo aysan ugu baaqan farsamo-xumo, isla markaana aan golaha ku hoggaamiyo midnimo, wadajir iyo sida danta dalka iyo dadka ay ku jirto,” ayuu yiri Cabdulqaadir Maxamed Nuur.
Gudoomiye Cabdulqaadir Maxamed Nuur ayaa sidoo kale sheegay inuu doonayo in Golaha Shacabka lagu hoggaamiyo wadajir iyo is-afgarad, si xildhibaannadu u gutaan waajibaadkooda dastuuriga ah.
Cabdulqaadir Maxamed Nuur ayaa sidoo kale ah xildhibaan ka tirsan Golaha Shacabka, halka uu ahaa Wasiirkii hore wasaarada Dekedaha iyo Gaadiidka Badda ee XFS.
.Hadalkan ayaa kusoo beegmaya xilli uu dalka ka jiro dhaqdhaqaaq siyaasadeed oo la xiriira hoggaanka iyo howlaha Golaha Shacabka, iyadoo Cabdulqaadir Maxamed Nuur uu dhawaan qabtay xilka Guddoomiyaha Golaha Shacabka jamhuuriyada federaalka soomaaliya.
