BAYDHABO — 17 Agoosto 2026: Wararka laga helayo magaalada Baydhabo ayaa sheegaya in saaka uu dagaal culus ka qarxay duleedka magaalada, kaas oo u dhexeeya ciidamo ka tirsan maamulka Koonfur Galbeed iyo xoogag la sheegay inay taageersan yihiin madaxweynihii hore ee Koonfur Galbeed, Cabdicasiis Xasan Maxamed Laftagareen.
Dagaalka ayaa bilowday tan iyo markii laga soo baxay salaadda Subax, iyadoo magaalada iyo nawaaxigeeda laga maqlayo rasaas xooggan iyo dhawaaqa hubka culus.
Xogaha laga helayo deegaanka ayaa tilmaamaya in dagaalku inta badan ka socdo duleedka Baydhabo, halka gudaha magaalada xaaladdu ay xilligan tahay mid ka deggan marka loo eego goobaha lagu dagaallamayo.
Wararka hordhaca ah ayaa sheegaya in xoogagga taageersan Laftagareen ay weerarka ka soo qaadeen dhowr jiho, iyagoo isku dayaya inay cadaadis ku saaraan fariisimaha ciidamada maamulka Koonfur Galbeed.
Waxaa sidoo kale jira warar sheegaya in hoobiyeyaal lagu garaacay qaybo ka mid ah magaalada, iyadoo rasaas iyo hub culus ay gaareen xaafado ka tirsan Baydhabo.
Qaar ka mid ah dadka deegaanka ayaa soo sheegay in guryo ay ku dhaceen rasaas, oo ay ka mid tahay rasaasta hubka fudud iyo baasuukaha.
Muuqaallo lagu faafiyay baraha bulshada ayaa sidoo kale muujinaya Xerada Boonkaay oo laga arkayo dab iyo qiiq, inkastoo aan weli si madax-bannaan loo xaqiijin sababta dabka iyo khasaaraha ka dhashay.
Sidoo kale, wararka deegaanka ayaa sheegaya in ciidamo badan oo la rumeysan yahay inay ka tirsan yihiin garabka taageersan Laftagareen lagu arkay xaafadda Mursal ee magaalada Baydhabo.
Xiisadda siyaasadeed iyo amni ee Koonfur Galbeed ayaa muddooyinkii dambe sii xoogeysanaysay.
Bishii Maarso 2026, dowladda federaalka ayaa ciidamo geysay Baydhabo, waxaana magaalada ka dhacay iska horimaadyo culus oo sababay in ciidamadii iyo maamulka Laftagareen ay lumiyaan gacan ku hayntii magaalada.
Warbixin ay daabacday APA ayaa sidoo kale hore u xaqiijisay in xoogag daacad u ah Laftagareen ay weerarro ka fuliyeen duleedka Baydhabo, taas oo muujinaysa in khilaafka siyaasadeed uu marar badan isu beddelay iska horimaad hubeysan.
Xaaladda hadda: Rasaasta ugu xooggan ayaa weli laga maqlayaa duleedka magaalada, halka gudaha Baydhabo xaaladdu ay tahay mid deggan marka loo eego jiidda dagaalka.
Tirada khasaaraha dhimasho iyo dhaawac ee dhinacyada iyo shacabka weli lama xaqiijin.
Dadweynaha Baydhabo ayaa wajahaya xaalad cabsi iyo hubanti-la’aan ah, iyadoo shacabka loogu baaqayo inay ka fogaadaan goobaha dagaalka, isla markaana ay ilaashadaan naftooda iyo carruurtooda.
Warsan Radio waxay sii wadi doontaa la socodka xaaladda Baydhabo iyo xogaha la xiriira dagaalka, iyadoo wararka aan si madax-bannaan loo xaqiijin loo soo bandhigayo sida xog hordhac ah.
