Ciidamada Dowladda Federaalka Soomaaliya iyo kuwa Daraawiishta maamulka Koonfur Galbeed ayaa fariisimo cusub oo lagu xoojinayo amniga ka sameystay duleedka magaalada Baydhabo, sida ay sheegayaan ilo ku sugan gobolka Baay.
Tallaabadan ayaa timid kaddib kulan xalay magaalada Baydhabo ku dhexmaray saraakiisha amniga ee Dowladda Federaalka iyo kuwa Koonfur Galbeed, kaas oo looga hadlay sidii looga hortagi lahaa weerarrada iyo falalka amni darro ee lagu beegsanayo magaalada.
Saraakiisha ayaa isla soo qaaday qorsheyaal cusub oo lagu adkeynayo ammaanka Baydhabo, iyadoo ciidamada dowladda iyo kuwa maamulka lagu amray inay sare u qaadaan feejignaantooda, gaar ahaan meelaha muhiimka ah ee magaalada iyo duleedkeeda.
Sidoo kale, waxaa la adkeeyay xakameynta isu socodka gaadiidka xilliyada hore ee subaxda iyo habeenkii, iyadoo ciidamo dheeraad ah la dhigay waddooyinka iyo goobaha laga cabsi qabo in laga soo abaabulo weerarro.
Weerarrada iyo falalka amni darrada ee ka dhanka ah maamulka Koonfur Galbeed ayaa bilihii lasoo dhaafay kordhay, waxaana saraakiisha amniga ay sheegeen inay dejinayaan qorsheyaal cusub oo looga hortagayo weerarradaas iyo wax kasta oo khatar ku ah xasiloonida Baydhabo.
Dhanka kale, waxaa sii kordhaya khasaaraha ka dhashay dagaalkii shalay aroortii ka dhacay magaalada Baydhabo iyo duleedkeeda, iyadoo wararka laga helayo deegaanka ay sheegayaan in meydad hor leh laga soo saaray goobihii uu dagaalku ka dhacay.
Meydadka ayaa la sheegay inay isugu jiraan dhinacyadii ku dagaallamay magaalada iyo dad rayid ah, iyadoo xaaladda Baydhabo ay weli tahay mid xasaasi ah, isla markaana ay socdaan dadaallo lagu xoojinayo amniga laguna yareynayo khatarta dagaallo kale.
