Hoggaamiyaha Koonfur Galbeed Soomaaliya, Mudane Aadan Maxamed Nuur (Aadan Madoobe), ayaa maanta booqday isbitaallada dadkii dhaawacyadii darnaa lageeyay, halkaas oo lagu dabiibayo qaar ka mid ah ciidamadii ku dhaawacmay dagaalkii ay Al-Shabaab ku soo qaadeen magaalada Baydhabo.
Hoggaamiye Aadan Madoobe ayaa intii uu booqashada ku guda jiray warbixinno ka dhageystay xaaladda caafimaad ee askarta dhaawacantay, isagoo u kuur galay adeegyada caafimaad ee ay helayaan.
Hoggaamiyaha ayaa Alle uga baryay ciidamada dhaawacmay inuu siiyo caafimaad degdeg ah, una fududeeyo soo kabashadooda, isagoo bogaadiyay naf-hurnimada iyo geesinimada ay muujiyeen ciidamada u taagan difaaca shacabka iyo amniga magaalada Baydhabo.
Aadan Madoobe ayaa sidoo kale sheegay in Dowladda Koonfur Galbeed ay garab taagan tahay ciidamada naftooda u huraya sugidda amniga iyo nabadda deegaanada Koonfur Galbeed, isla markaana ay sii wadi doonto taageerada iyo dhiirrigelinta ciidamada.
Booqashadan ayaa ku soo beegmaysa xilli uu dhawaanahan ku sugnaa magaalada muqdisho halkaas uu kulamo gaar gaar kula yeelanayay madaxda federaalka iyo hay’adaha caalamiga, dhanka kale dhawaanahaan magaalada baydhabo ay ka jiraan xaalado amni oo la xiriira dagaalladii u dhexeeyay ciidamada dowladda iyo Al-Shabaab.
