Isbahaysiga Milatari ee Islaamiga ah ee La-dagaallanka Argagixisada (IMCTC) ayaa Soomaaliya ka bilaabaya barnaamij ballaaran oo mashaariic iyo tababbarro ah, kuwaas oo lagu fulin doono in ka badan toban hay’adood oo ka tirsan dowladda Soomaaliya.
Barnaamijka ayaa si rasmi ah uga bilaabanaya aqoon-is-weydaarsi ku saabsan warbaahinta iyo nabadda, kaas oo loo qabanayo ku dhowaad 40 wariye iyo saameeyayaal baraha bulshada.
Tababarku wuxuu diiradda saari doonaa doorka warbaahinta ee xoojinta nabadda, wacyigelinta bulshada iyo ka hortagga fikirka xagjirka ah.
Safiirka Soomaaliya u qaabilsan IMCTC, General Cabdiraxmaan Maxamed Turyare, ayaa sheegay in aqoon-is-weydaarsigan uu yahay tallaabadii ugu horreysay ee barnaamij mashaariic ah oo socon doona illaa 2027, isla markaana gaari doona in ka badan toban hay’adood oo dowladeed.
Hay’adaha ka faa’iideysan doona barnaamijka waxaa ka mid ah Wasaaradaha Gaashaandhigga, Amniga Gudaha, Warfaafinta, Maaliyadda iyo Awqaafta, Hay’adda Tubsan, Sanduuqa Xasilinta, Xafiiska Amniga Qaranka, Hay’adda Socdaalka iyo Jinsiyadda iyo hay’adaha isgaarsiinta.
Mashaariicda qorshuhu wuxuu sidoo kale ku saabsan yahay tababbar iyo qalabeyn loo sameynayo ciidamada qalabka sida, barnaamijyada dib-u-dhaqan-celinta, xoojinta amniga dhaqaale iyo horumarinta habraacyada garsoorka ee kiisaska la xiriira argagixisada.
Barnaamijkan ayaa la filayaa inuu xoojiyo iskaashiga Soomaaliya iyo IMCTC, isagoo isku xiraya dhinacyada amniga, warbaahinta, dhaqaalaha, caddaaladda iyo xasilinta bulshada, si loo taageero dadaallada Soomaaliya ee ka dhanka ah argagixisada iyo xagjirnimada.
