Maamulka Gobolka Bay iyo kan Degmada Baydhabo ayaa magaalada Baydhabo ku qabtay kulan wacyigelin ah oo lagu xoojinayay fahamka iyo ka-qaybgalka bulshada ee arrimaha amniga, nabadda iyo horumarka degmada.
Kulanka waxaa ka qeyb galay mas’uuliyiin ka tirsan maamulka gobolka iyo degmada, odayaasha dhaqanka, qeybaha bulshada iyo xubno kale oo bulshada Baydhabo ah.
Mas’uuliyiinta ayaa kulanka ka jeediyay hadallo ku saabsan muhiimadda ay leedahay in bulshada iyo maamulka ay yeeshaan wada-shaqeyn dhow, gaar ahaan ilaalinta amniga iyo xasilloonida magaalada.Sidoo kale, bulshada ayaa lagu boorriyay inay la shaqeeyaan laamaha amniga, soo gudbiyaan xogaha la xiriira falalka amni-darrada ah, isla markaana ay ka fogaadaan wax kasta oo wax u dhimaya nabadda iyo wadajirka bulshada.
Maamulka Gobolka Bay iyo Degmada Baydhabo ayaa sheegay in kulamada noocan ah ay muhiim u yihiin in bulshada si joogto ah loogu wacyigeliyo waajibaadkooda iyo doorkooda ku aaddan nabadgelyada iyo horumarinta deegaanka.
Kulankan ayaa ku soo beegmaya xilli magaalada Baydhabo ay muhiimad gaar ah u leedahay xasilloonida iyo amniga guud ee Gobolka Bay, iyadoo maamulka iyo bulshada ay si wadajir ah uga shaqeynayaan sidii loo sii xoojin lahaa nabadda iyo kala dambeynta.
