Guddoomiyaha Golaha Shacabka Jamhuuriyadda Federaalka Soomaaliya ayaa ka hadlay muhiimadda ay leedahay munaasabadda lagu maamuusay shaqadii Golaha Shacabka ee ku aaddan gudashada waajibkiisa dastuuriga ah, gaar ahaan doorashadii Guddoomiyaha Golaha.
Guddoomiyuhu wuxuu si gaar ah ugu mahadceliyay Guddoomiyaha Gobolka Banaadir ahna Duqa Muqdisho, Xasan Maxamed Xuseen Muungaab, iyo dhammaan bahda Dowladda Hoose ee Xamar, isagoo ku ammaanay doorkooda ku aaddan qabashada munaasabadda.
Wuxuu sidoo kale sheegay in Golaha Shacabka uu si buuxda uga shaqeyn doono kaalintiisa dastuuriga ah ee hirgelinta Maqaamka Caasimadda Muqdisho, kaas oo uu tilmaamay in lagu jideeyay Qodobka 63aad ee Dastuurka Jamhuuriyadda Federaalka Soomaaliya.
Guddoomiyaha ayaa xusay in si degdeg ah loo dardargelinayo soo saarista xeerarka iyo shuruucda nidaaminaya maqaamka caasimadda, si Muqdisho ay u hesho maqaam dowladeed oo waafaqsan dastuurka iyo xuquuqda shacabka ku nool.
“Waxaan isku hawli doonaa inaan noqdo Guddoomiyihii Golaha Shacabka ee dadka Muqdisho ku garab istaagay inay helaan maqaamka dowladeed ee ay mudan yihiin,” ayuu yiri Guddoomiyaha Golaha Shacabka.
Hadalkan ayaa kusoo beegmaya xilli doodda ku saabsan Maqaamka Caasimadda Muqdisho ay ka mid tahay arrimaha muhiimka ah ee horyaalla hay’adaha dowladda, iyadoo hirgelintiisu ay u baahan tahay wada-shaqeyn iyo isku-duwid dhex marta Golaha Shacabka, Dowladda Federaalka iyo maamulka Gobolka Banaadir.
