Wasaaradda Dhallinyarada iyo Ciyaaraha ee Koonfur Galbeed Soomaaliya ayaa magaalada Baydhabo ku qabatay dood-wadaag furan oo bille ah, kaas oo diiradda lagu saaray kaalinta dhallinyarada ay ku leeyihiin nabad-dhisidda, xoojinta amniga, ka hortagga colaadaha iyo isku-xirka bulshada.
Dood-wadaagga waxaa ka qeybgalay in ka badan 100 dhallinyaro firfircoon, kuwaas oo ka kala socday jaamacadaha, ururrada bulshada rayidka ah, ururrada dhallinyarada, haweenka iyo xaafadaha kala duwan ee magaalada Baydhabo.
Intii uu socday kulanka, dhallinyaradu waxay si toos ah su’aalo iyo aragtiyo ugu jeediyeen xubnihii Panel-ka, oo ka koobnaa:
* Mudane Mowliid Xasan Xuseen, Wasiirka Wasaaradda Dhallinyarada iyo Ciyaaraha Koonfur Galbeed Soomaaliya;
* Xildhibaan Luul Halgan, Xildhibaan ka tirsan Golaha Shacabka;
* Aadan Geesey, oo matalayay bahda warbaahinta;
* Mohamed Abuukar, oo ka socday ururrada bulshada rayidka ah;
* Abwaan Cabdimajiid Idhaaymaale, oo matalayay aqoonyahannada iyo suugaanleyda.
Dooddu waxay fursad u siisay dhallinyarada inay si furan uga hadlaan caqabadaha amni iyo bulsho ee saameeya noloshooda, iyagoo soo bandhigay fikrado, su’aalo iyo talooyin ku saabsan sidii dhallinyaradu door muuqda uga qaadan lahaayeen nabad-dhisidda iyo horumarinta bulshada.
Sidoo kale, waxaa si gaar ah looga hadlay doorka warbaahinta, haweenka, aqoonyahannada iyo suugaanleyda ay ka qaadan karaan amniga iyo nabad-dhisidda.
Warbaahinta waxaa lagu dhiirrigeliyay inay door ka qaadato wacyigelinta bulshada, faafinta xogta saxda ah iyo ka fogaanshaha wararka iyo farriimaha hurin kara colaadaha.
Haweenka waxaa lagu tilmaamay inay yihiin laf-dhabar muhiim u ah nabad-dhisidda, maadaama ay door weyn ka qaadan karaan ka hortagga colaadaha, dhexdhexaadinta khilaafaadka iyo wacyigelinta bulshada.
Aqoonyahannada waxaa la xusay doorkooda ku aaddan cilmi-baarista, talo-bixinta iyo soo saarista xalal ku saleysan aqoon iyo xaqiiqooyin.
Suugaanleyda iyo hal-abuurka ayaa iyaguna door muhiim ah ku leh gudbinta farriimaha nabadda, midnimada, wada-noolaanshaha iyo isku-xirka bulshada, iyadoo suugaanta iyo fanku yihiin aalado si weyn bulshada u taaban kara.
Dood-wadaaggan wuxuu sidoo kale muujiyay in amniga iyo nabaddu aysan ahayn masuuliyadda dowladda oo keliya, balse ay tahay masuuliyad wadajir ah oo ay leeyihiin dhallinyarada, haweenka, warbaahinta, aqoonyahannada, suugaanleyda, bulshada rayidka ah iyo dhammaan qeybaha bulshada.
Wasaaradda Dhallinyarada iyo Ciyaaraha DKGS waxay caddeysay inay sii wadi doonto madashan oo noqon doonta dood-wadaag bille ah oo joogto u socda, si loo xoojiyo ka-qaybgalka dhallinyarada, loo dhiirrigeliyo wada-hadalka bulshada, loona abuuro fursado ay dhallinyaradu si toos ah ula falgalaan masuuliyiinta iyo qeybaha kala duwan ee bulshada.
Dhallinyaradu waa laf-dhabarta nabadda, amniga, isku-xirka bulshada iyo horumarka Koonfur Galbeed Soomaaliya.
