Guddoomiyaha Golaha Shacabka ee Baarlamaanka Federaalka Soomaaliya, Mudane Aadan Maxamed Nuur (Aadan Madoobe), ayaa kulan la yeeshay Guddiga Baarlamaanka ee Maaliyadda, Miisaaniyadda, Qorsheynta, Iskaashiga Caalamiga ah iyo La-xisaabtanka Hay’adaha Dowladda.
Kulanka ayaa diiradda lagu saaray shaqada guddiga iyo muhiimadda ay leedahay in la xoojiyo kormeerka baarlamaanka, hufnaanta iyo isla-xisaabtanka ee la xiriira maaliyadda guud iyo hay’adaha dowladda.
Guddoomiyaha Golaha Shacabka ayaa bogaadiyay shaqada guddiga, isaga oo ku boorriyay xubnaha inay sii xoojiyaan doorkooda ku aaddan dabagalka iyo kormeerka maamulka hantida iyo dhaqaalaha qaranka.
Sidoo kale, waxaa la adkeeyay muhiimadda ay leedahay in la helo maamul maaliyadeed oo hufan, isla markaana hay’adaha dowladda ay si cad oo masuuliyad leh uga jawaabaan waajibaadkooda iyo isticmaalka kheyraadka dadweynaha.
Kulankan ayaa qeyb ka ah dadaallada Baarlamaanka Federaalka Soomaaliya uu ku xoojinayo kormeerka hay’adaha dowladda, hufnaanta maaliyadda iyo isla-xisaabtanka, kuwaas oo muhiim u ah horumarinta dowladnimada iyo adeegyada shacabka.
