Waxaa magaalada London ee dalka UK lagu qabtay xaflad lagu soo dhoweynayay laguna taageerayay Guddoomiyaha cusub ee Golaha Shacabka ee Baarlamaanka Jamhuuriyadda Federaalka Soomaaliya, Cabdulqaadir Maxamed Nuur (Jaamac).
Munaasabadda ayaa waxaa ka qeyb galay qeybaha kala duwan ee bulshada Soomaaliyeed ee ku nool London, kuwaas oo muujiyay soo dhoweyn iyo taageero ay u hayaan Guddoomiyaha cusub.
Cabdulqaadir Maxamed Nuur (Jaamac) ayaa 10-kii Agoosto 2026 loo doortay Guddoomiyaha Golaha Shacabka, kaddib doorasho ka dhacday Muqdisho, isagoo helay 142 cod, halka musharraxii la tartamay uu helay 30 cod.
Guddoomiyaha cusub ayaa xilka si rasmi ah ula wareegay 12-kii Agoosto, isagoo sheegay inuu Golaha Shacabka ku hoggaamin doono caddaalad, hufnaan iyo wadajir, isla markaana mudnaanta siin doono shaqada sharci-dejinta iyo gudashada waajibaadka dastuuriga ah ee Golaha.
Xafladda London ayaa sidoo kale ka tarjumeysa doorka ay bulshada Soomaaliyeed ee qurba-joogta ahi ku leeyihiin taageerada iyo dhiirrigelinta hay’adaha dowliga ah iyo hoggaanka dalka.
**Sawirrada munaasabadda ayaa muujinaya dadweyne Soomaaliyeed oo ka qeyb galay xafladda, iyagoo soo dhaweynaya Guddoomiyaha Golaha Shacabka.**
