Wasaaradda Caafimaadka iyo Daryeelka Bulshada ee Dowladda Koonfur Galbeed Soomaaliya ayaa maanta booqasho kutagay isbitaalada baydhabo asigoona halkaas gaarsiiyay daawooyin iyo agab caafimaad oo kala duwan saddex isbitaal oo ku yaalla magaalada Baydhabo, kuwaas oo kala ah Bay Regional Hospital, Bay Haaw Hospital iyo Isbitaalka Degmada Baydhabo.
Daawooyinka iyo agabka caafimaad ayaa loogu talagalay in lagu xoojiyo awoodda isbitaallada ee jawaabta caafimaad ee xaaladaha degdegga ah, iyo in bukaannada u baahan adeegyada caafimaad ee degdegga ah loo helo daryeel ku filan.
Wasiirka Wasaaradda Caafimaadka iyo Daryeelka Bulshada ee Dowladda Koonfur Galbeed Soomaaliya, Mudane Cabdqaadir Shariif Sheekhuna, ayaa goob joog ka ahaa gaarsiinta daawooyinka iyo agabka caafimaad ee Isbitaalka Gobolka Bay.
Intii uu Wasiirku ku guda jiray booqashada, wuxuu kormeer ku sameeyey qaybaha kala duwan ee Isbitaalka Gobolka Bay, isagoo si gaar ah u xog-wareystay xaaladda bukaannada ku jira isbitaalka, baahiyahooda caafimaad iyo adeegyada ay helayaan.
Wasiirka ayaa sidoo kale warbixinno ka dhageystay maamulka iyo shaqaalaha caafimaadka ee isbitaalka, isagoo kormeeray qaybaha adeegyada caafimaad ee kala duwan ee ka socda isbitaalka, iyo sida ay uga jawaabayaan baahiyaha caafimaad ee bulshada.
Wasiirka waxaa booqashada ku wehliyay masuuliyiin ka tirsan Wasaaradda Caafimaadka iyo maamulka Isbitaalka Gobolka Bay.
Wasaaradda Caafimaadka iyo Daryeelka Bulshada ee Dowladda Koonfur Galbeed waxay sii wadi doontaa dadaallada lagu xoojinayo adeegyada caafimaad iyo diyaar-garowga jawaabaha degdegga ah, iyadoo mudnaanta la siinayo badbaadinta nolosha iyo daryeelka bukaannada.
