Agaasimaha Guud ee Wasaaradda Waxbarashada, Hiddaha iyo Tacliinta Sare ee Dowladda Koonfur Galbeed Soomaaliya, Mudane Fadal Cabdullaahi Mursal, ayaa magaalada Nairobi kaga qaybgalay shir ku saabsanaa taageerada iyo dardargelinta hirgelinta Mashruuca Rajo Kaaba.
Shirka oo socday muddo saddex maalmood ah ayaa diiradda lagu saaray qiimeynta heerka uu marayo hirgelinta Mashruuca Rajo Kaaba, horumarka laga sameeyay iyo arrimaha u baahan in la xoojiyo lana dardargeliyo.Shirka waxaa ka qaybgalay masuuliyiin ka socday Wasaaradda Waxbarashada, Hiddaha iyo Tacliinta Sare ee Dowladda Federaalka Soomaaliya, Wasaaradaha Waxbarashada Dowlad-goboleedyada, Agaasinka Waxbarashada Gobolka Banaadir iyo Bangiga Adduunka.
Intii uu shirku socday, dhinacyadu waxay si wadajir ah dib-u-eegis ugu sameeyeen qaybaha kala duwan ee Mashruuca Rajo Kaaba, iyagoo si gaar ah diiradda u saaray horumarinta xirfadaha iyo fursadaha waxbarasho ee haweenka, maamulka iyo maaliyadda mashruuca, iyo arrimaha u baahan in la xoojiyo si loo xaqiijiyo hirgelin wax-ku-ool ah.
Gabagabadii shirka, dhinacyadu waxay isla meel dhigeen tallaabooyin mudnaan leh oo lagu xoojinayo isku-duwidda, isla-xisaabtanka iyo wada-shaqeynta hayβadaha, si loo dardargeliyo howlaha socda, loona xaqiijiyo in natiijooyinka Mashruuca Rajo Kaaba ay si wax-ku-ool ah u gaaraan haweenka iyo gabdhaha Soomaaliyeed.
