Hoos ka dhageyso Barnaamijka oo caawa aqrinayo wariye Yusuf Sheekh Aadan (Qalinle)
Ra’iisul Wasaaraha Xukuumadda Federaalka Soomaaliya Xamsa Cabdi Barre, ayaa kormeer uu ugu kuur galayo xaaladda bini’aadanimo ee ka dhalatay roobabka daadadka wata ee ka da’ay qeybo kamid ah gobollada dalka, waxa uu ku tagey degmada Doolow ee Gobolka Gedo.
Wafdiga Ra’iisul Wasaaraha ayaa waxaa garoonka diyaaradaha ee degmada Doolow si diirran ugu soo dhaweeyey Madaxweyne ku-xigeenka koowaad ee Dowlad Gobolleedka Jubbaland, Mudane Maxamuud Sayid Aadan, masuuliyiin ka tirsan dowlad-gobolleedka iyo qeybaha kala duwan ee bulshada ku dhaqan Doolow.
Milatariga Israa’iil ayaa siidaayay muuqaal kaamirooyinka CCTV-ga ah oo muujinaya laheysteyaal Israa’iiliyiin ah oo la geynayo isbitaalka al-Shafa, oo ah isbitaalka ugu weyn Qasa, kaddib weerarradii 7-dii Oktoobar ee Xamaas.
Afhayeen u hadlay ciidamada Israa’iil ayaa sheegay in mid ka mid ah dadka la qafaashay oo ahayd haweeney askariyad ah lagu dilay halkaas.
Waxa uu sheegay in 19-sano jir ka tirsaneed ciidamada Israa’iil oo lagu magacaabi jiray Captain Nova la dilay ka dib markii isbitaalka la keenay iyadoo dhaawac fudud ah.
Israa’iil ayaa ku celcelisay in Xamaas ay isbitaalka al Shifa ka dhigtay saldhig, balse Xamaas ayaa arrintaa beenisay.
Ciidanka Kumaandooska Gor Gor ururka Saddexaad iyo Ciidanka degaanka ayaa howlgal ay ka fuliyeen galbeedka Xarardheere waxaa ay sheegeen inay ku dileen xubin sare oo Al-Shabaab iyo dagaalamaayal la socday.
Taliyaha ururka saddexaad Dhamme Cali Cageey oo la hadlay warbaahinta Qaranka ayaa sheegay in ciidanka howlgal qorsheeysan ay ka fuliyeen Tuula Xaaji, ay ku dileen saddex xubnood oo ka tirsan dagaalamaayasha Al-Shabaab.
Sidoo kale taliyaha ayaa sheegay in ciidanka ay furteen Hub iyo saanad ciidan,goobta howlgalka ka dhacayna ay ku sugan yihiin ciidanka xoogga iyo kuwa deegaanka.
Ciidanka Qaranka qeybahooda kala duwan ayaa maalmihii ugu danbeysay howlgallo ka waday deegaanno ka tirsan Gobolka Mudug.
Ciidanka Hoggaanka Baarista Dambiyada dowlad goboleedka Puntland ee katirsan ciidanka Booliska Soomaaliyeed ayaa sheegay inay gacanta ku dhigeen koox ka tirsan Daacish oo Qaraxyo ku diyarinayay Magaalada Boosaaso.
Ciidamada ayaa sheegay inay fashiliyeen Miino ay kooxda Daacish dooneysay iney ku la beegsadaan shaqaalaha shirkadda dhismaha ee Bulsho iyo shacab Soomaaliyeed oo waxba galabsan.
Hay’adaha amaanka ayaa intaasi kud aray in howgal ay ku qabteen qaraxaasi oo ay xogtiisa heleen.
Ciidanka Boliiska Soomalaiyeed, labadiisa heer ee Dowlad Goboleedyada iyo Kan Dowlada dhexe ayaa howgallo wadajir ah sameeya, kuwaasi ka dhan ah falalka amniga liidka ku ah.
Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi hoggaaminayo ayaa gaaray magaalada London ee xarunta dalka Ingiriiska.
Mudane Xasan Sheekh Maxamuud iyo wafdigiis ayaa waxay ka qeyb-galyaan shirka hoggaamiyeyaasha caalamka ee ka hortagga cunno yarida iyo aafooyinka sababa.
Sidoo kale, Madaxweyne Xasan Sheekh ayaa Kulamo la qaadan doona Madaxda dalka Ingiriiska oo uu kala hadli doono dagaalka ka dhanka ah Alshabaab iyo in ay ka taageeraan Soomaaliya qorshaha qaran ee qaadista cunaqabateynta hubka ee saaran dalkeenna, maadaama ay xubin ka yihiin Golaha Ammaanka ee Qaramada Midoobey.
Baydhabo-{WMN}-Barnaamijka Kulanka Warsan waxaad Caawa kaga boganidoontaan Wareeysiyo aad xasaasi u ah, khudbadiha shirarkii maanta Madaxda Somaliya ay ku qabteen Dalka iyo dibadiisa. waxaa Caawa soo saarey soona jeedinaaya Wariye Yuusuf Sheikh Aden (Qalinle} Dhageysi wanaagsan.
Madaxweynaha Jamhuuriyadda Federaalka Soomaaliya Xasan Sheekh Maxamuud ayaa kulan sagootin ah u sameeyay safiirka Kenya u fadhiya Soomaaliya, Maj Gen (Rtd) Thomas Chepkuto, oo dhameystay muddo xileedkiisa danjirimo.
Mudane Xasan Sheekh Maxamuud ayaa Maj Gen (Rtd) Thomas Chepkuto ku bogaadiyey shaqada wanaagsan ee ah adkeynta xiriirka Soomaaliya iyo Kenya iyo gudashada waajibaadkiisa.
Safiirka Kenya u fadhiya Soomaaliya Maj. Gen Thomas Chepkuto ayaa uga mahad celiyey Madaxweynaha iyo guud ahaan dowlada Somalia sida wanaagsan ee ay ula shaqeeyeen mudadii uu dalkiisa u joogay Muqdisho.
Madaxweynaha Koonfur Galbeed Cabdicasiis Xasan Maxamed Laftagareen, Wasiirka gaashaan-dhigga XFS, qaar ka mid ah golaha wasiirada koofur gabeed iyo masuuliyiin kale ayaa si weyn loogu soo dhaweeyey maanta Magaalada Diinsoor ee Gobolk Baay.
Ujeedka ay madaxdu halkaas u gaarayn ayaa lagu sheegay in ay tahay soo xerista shir dib u hishiisiin ah oo magaaladaas ka socday iyo sidii bulshada Diinsoor dagta ay ugu sheegi lahaayeen inay u diyaar garoobaan ka qayb qaadashada howlgalka dalka looga xoraynayo Al-Shabaab gaar ahaan deegaanada koofur galbeed.
Cabdicasiis Xasan Maxamed Laftagareen ayaa kulamo la qaadan doona Odayaasha iyo Waxgaradka Diinsoor, isagoona kala hadli doona xaaladda degmada iyo baahiyaha jira ee loo baahan yahay in wax laga qabto.
Sidoo kale Madaxweyne Lafta-gareen ayaa booqasho ku tagaya Xarumo ciidan oo ku yaalla Magaalada Diinsoor ee Gobolk Baay, wuxuuna kulmayaa saraakiisha ciidamada.
Maxkamadda Ciidamada qalabka sida ayaa saaka oo Axad ah dil toogasho ah ku fulisay Cabdisalaan Cali Axmed oo dhawaan magaalada Guriceel ee Gobolka Galgaduud ku dilay Wiil la dhashay Taliyaha Booliska degmada Guriceel Cabdullaahi Cali Huday.
Goob fagaare ah oo ku taalla Guriceel ayaa lagu toogtay Cabdisalaan Cali oo ay hore Maxkamadda ciidamada dil toogasho ah ugu xukuntay, kadib markii lagu helay inuu dilka geystay Cabdisalaan Cali oo ahaa ciidanka NISA ee dowladda Federaalka.
Ciidanka NISA iyo kuwa Booliska ayaa gacanta kusoo dhigay Cabdisalaan oo baxsaday markii uu 9 bishaan November 2023 dil u geystay Allaha u naxariistee Cabdullaahi Cali Huday oo ahaa wiil la dhashay Taliyaha Booliska Guriceel.
Dadka ku dhaqan Guriceel ayaa horey uga dalbaday laamaha caddaaladda in ninka dilka gestay la geeyo tiirka lana toogto, waxa ayna tilmaameen in toogashada xal u noqoneyso dilalka micno darrada ah ee dadka loo geesto.
Dhowr jeer oo hore ayaa sidaan oo kale waxaa dilal toogasho ah loogu fuliyay rag dilal u geystay Askar iyo dad shacab ah, waxaana Maxkamadda ciidamada ay sheegtay in cid kasta oo dilal geysata cadaalada lahor geyn doono.