Qarax miinada nooca dhulka lagu Aaso ah, isla markaana jugtiisa laga maqlay qaar kamid ah degmooyinka Gobolka Banaadir ayaa waxaa uu Maanta ka dhacay degmada Deyniile gaar ahaan halka loo yaqaan Ceelka Ifis, waxaana ka dhashay khasaaro dhimasho & dhaawac ah.
Goobjoogayaal ayaa waxaa ay sheegeen in qaraxa lala beegsaday Gaari nooca dagaalka ah ee loo yaqaan Cabdi Bilaha, kaas oo la sheegay in uu leeyahay Guddoomiye kuxgeenka Amniga iyo Siyaasadda Maamulka Gobolka Banaadir Cali Cabdi Wardheere (Cali Yare), sida ay Risaala u xaqiijiyeen illo dhanka ammaanka ah.
Qaraxa ayaa inta la xaqiijiyay waxaa ku geeriyooday Saddex Ruux oo kala ah laba Carruur walaalo ah oo wadada marayay iyo hal askari oo saarnaa Gaariga Cabdi bilaha ah, halka ay ku dhaawacmeen Saddex qof oo kale oo Shacab ah, oo saarnaa gaari nooca raaxada ah oo goobta marayay.
Ciidamo katirsan kuwa Booliska iyo Millateriga ayaa gaaray halka uu qaraxa ka dhacay, iyaga oo muddo kooban xiray isku socodka dadka iyo Gaadiidka wallow markii dambe ay dib u fureen.
Mas’uuliyiinta laamaha amniga dowladda Soomaaliya ayaan weli ka hadlin qaraxa, hayeeshee wuxuu kusoo beegmayaa xilli weli Muqdisho ay ka taagan tahay dhibaatadii ka dhalata qaraxyadii dhacay 29-kii Bishii Octoobe Isgoyska Soobe ee Magaalada Muqdisho.