Dacwad oogaha maxkamadda caalamiga ah ee dambiyada ee ICC, Karim Khan ayaa hoosta ka xariiqay in maxkamadda Heeg (Hague) ay si dhab ah u raadineyso soo qabashada madaxweynaha Ruushka Vladimir Putin oo loo haysto dambiyo dagaal iyo inuu si sharci darro ah u tarxiilay carruur laga keenay Ukraine oo loo soo tarxiilay Ruushka.
Khan oo hadda ku sugan magaalada Nairobi ayaa sheegay in maxkamadda ICC ay soo saartay amar lagu soo xidhayo Putin tan iyo markii cadeymaha la horkeenay Maxkamadda.
ICC ayaa sheegtay in Putin uu dambiyadaas ka geystay Ukraine laga soo bilaabo bishii labaad ee sanadkii 2022. Kremlin-ka looga taliyo Ruushka ayaa waarankii la soo saaray ee ka dhanka ahaa Putin ku tilmaamay “wax laga xumaado.”
