Shabaabta Gobolka Hiiraan oo gacanta ka gooyay nin dhalinyaro ah

Ururka Mayalka adag ee Shabaab ayaa gacantiisa midig ka gooyay nin dhalinyaro ah oo lagu soo eedeeyay inuu xatooyo ka geystay deegaanka Ceel Cali oo ka tirsan Gobolka Hiiraan.
Fagaare ku yaal deegaanka Ceel Cali ayaa la isugu keenay dadkii deegaanka oo daawanaayay qaabka uu u dhacay xukunka gacan goynta ah, maadaama maxkamada Deegaanka Ceel Cali xukunkaan ay riday.
Ninka gacanta laga gooyay, ayaa lagu magacaabaa Cabdi Maxamed Cilmi oo 29-sano jir ah, kaasi oo sida maxkamada ay sheegtay lagu helay dambi xatooyo ah oo uu xaday dukaan ku yaala deegaanka Ceel Cali.
Ciidamada loo yaqaan Xisbada ee ka tirsan Al Shabaab ayaa ninkaan soo qabtay, kuwaasi oo gacanta uga gooyay goobta fagaaraha ah ee la keenay.
Cabdi ayaa la sheegay allaabta uu xaday qiimo ahaan inay gaarayaan $98.4 oo doolarka Mareykanka ah, taasi oo sabab u noqotay in gacantiisa qaybta hore uu ku waayay.
Dukaanka uu jabsaday ayaa la sheegay inuu ka xaday labo garaam oo dahab ah, Macawiis, Cimaamad Mobile iyo Catar, sida maxkamada Shabaabka ay sheegtay.
Shabaab ayaa xukunada ay fuliyaan waxa uu yahay mid hal dhinac ah oo inta badan dadka ay xukunada ku ridaan aysan u qaban qareeno difaaco.