Halyeygii kooxda kubadda cagta Leeds United ee Norman Hunter ayaa u geeiryooday xanuunka Corovnirus oo uu maalmo ugu jiray cusbitaal.
Norman Hunter oo ay da’diisu ahayd 76 jir oo lagu naanaysi jiray ‘Bites Yer Legs’, ahaana ninkii udub-dhexaadka u ahaa guulihii ay kooxdaasi gaadhay xilliyadii ay ka talinaysay Ingiriiska ayaa geeridiisu gilgishay Ingiriiska iyo dunida kalaba, waxaana maanta loo sheegay reer England in laacibkaas weyn ay waayeen.
Laacibkan oo Leeds United ka caawiyey inay ku guuleysato laba jeer horyaalka Ingiriiska ayaa xulka qaranka England lagu daray koobkii adduunka ee 1966-kii waana koobka ay illaa hadda taageereyaasha Ingiriisku xasuustiisa ku raaxaystaan ee ay raadiyaan mid kale oo ay kusoo labeeyeen.
Hunter ayaa cusbitaalka la dhigay 10 April markii uu ku dhacay Coronavirus, waxaana uu ku geeriyooday cusbitaalkaas.
Warbixin ay Leeds soo saartay ayay ku sheegtay in qoyska kooxdooda uu ka baxay laacib weyn oo ay ku jiraan waqti adag, waxaanay tacsi u dirtay ehellada uu ka baxay.
Norman Hunter oo difaaca ka ciyaari jiray, waxa Leeds United uu ku biiray isaga oo 15 jir ah, waxaanu u saftay 726 ciyaarood oo dhamaan tartamada ah, waxaanu yahay laacibka afraad ee ugu safashada badan taariikhda naadiga.
Sannadkii 1969kii ayuu horyaalka Ingiriiska kula guuleystay, sidoo kalena 1974 ayay mar kale hanteen, iyadoo 1968-kiina ay Arsenal ku garaaceen finalkii League Cup oo ay ka hor qaadeen. 1972-kii ayaa sidoo kale ay garoonka Wembley isku haleeleen Arsenal finalkii FA Cup oo ay koobka kaga qaadeen.
1975-kii waxa Leeds United oo uu hormood u ahaa Norman Hunter ay tageen finalka Champions League oo ay iskugu soo baxeen Bayern Munich, waxaana kulankan oo ka dhacay magaalada Paris koobka qaadatay kooxda reer Germany.
Labadii sannadood ee 1968-kii iyo 1971-kii ayay Leeds United guulo ka keentay qaaradda Yurub iyagoo ku guuleystay koobkii magaalooyinka ee loo yaqaanay Inter-Cities Fairs Cup oo ay labada ku guuleysatay xilli uu tiir-dhexaadkooda ahaa Norman Hunter.
Si kastaba, maanta ayaa loo barooranayaa geerida Norman Hunter oo raad weyn ku lahaa xulka qaranka England iyo Kooxda Leeds United.