Ciidanka dowladda Federaalka Soomaaliya iyo kuwa Midowga Afrika ee AMISOM ayaa saacadihii lasoo dhaafay howlgalo waxaa ay ka sameeyeen xaafaddaha kala duwan ee degmada Buulo-burte ee Gobolka Hiiraan, dowlad Goboleedka Hirshabeelle.
Ciidamada dowladda iyo kuwa AMISOM ayaa howlgalka inta uu socday waxaa ay baaritaano kala duwan ku sameeynayeen guryaha ku yaalla xaafaddaha ay ka kooban tahay degmada, iyagoona kusoo qab-qabtay dhow qof oo laga shakiyey
Taliyaha Saldhiga Booliska degmada Buulo-burte Cabdi Maxamed Cabdi Buur oo la hadlay warbaahinta ayaa u sheegay in ujeedka la sameeyay howlgalka uu ahaa mid lagu doonayo in lagu xaqiijiyo amniga, maadaama lagu jiro bisha Ramaadan oo ay dhici karaan weeraro ay geystaan Al-shabaab.
Taliye Cabdi Maxamed Buur ayaa waxaa uu intaas kusii daray in howlgalka lagu soo qab qabtay dhowr qof oo looga shakiyey falal amni darro, isla markaana laamaha amniga dowladda Federaalka Buulo-burte ay ku wadaan baaritaano lagu hubinayo dadkaas.
Degmada Buulo-burte ee Gobolka Hiiraan ayaa waxaa mararka qaarkood ka dhaca falal amni darro oo ay geystaan Al-shaabab, waxaana degmadaas kamid tahay degmooyinka Gobolka Hiiraan ay sanno badan Go’doomiyeen dagaalamayaasha Al-shabaab.
