Baydhabo-{WMN} Kulan Wadareedka labaad ee Golaha Wasiirrada Xukuumadda Federaalka Soomaaliya oo uu guddoominayo Ra’iisul Wasaaraha dalka Xamse Cabdi Barre ayaa Maanta ka furmay Magaalada Muqdisho, waxaana sidoo kale kulanka qeyb ka ah Guddoomiyaha Golaha Shacabka Sheekh Aadan Maxamed Nuur (Madoobe).
Kulanka oo soconaya muddo laba maalin ah ayaa lagu lafa-gurayaa howllaha mudnaanta u leh xukuumadda Dan-Qaran iyo habka loo xoojin karo wadashaqeynta wasaaradaha iyo hay’addaha kala duwan ee dowladda.
Ra’iisul Wasaaraha Soomaaliya Xamse Cabdi Barre ayaa sheegay in si loo fuliyo baahiyaha ay qabaan shacabka ay laga maarmaan tahay in hay’adaha dowliga & Wasaaradaha isku faham ka yihiin si dhowna u wada Shaqeeyaan.
Ujeedada ugu weyn ee loo qabtay kulankaan ayuu Ra’iisul Wasaaraha ku sheegay dardar gelinta nidaamka wadashaqeynta hay’adaha dowladda , isla jaanqaadka Golaha iyo falanqeynta howlaha hortebinta u leh xukuumadda.
Sidoo kale Ra’iisul Wasaraha waxaa uu hadalkiisa uu intaasi kudaray in u jeedkoodu uu yahay sidii loo adkeyn lahaa xeerarka dalka, hergelinta qorshaha xukuumadda si waafaqsan dastuurka iyo sharciyada kale ee u degan dalka.
Ugu dambeyn Ra’iisul Wasaaraha wuxuu sheegay in kulan wadareedkaan uu kusoo beegmay xilli dadka Soomaaliyeed ay la daalaa dhacayaan abaaro, & amni darro is biirsaday, isla markaana waxka qabashadooda looga baahan yahay Golaha Wasiirada Soomaaliya.
Maalinta Berito oo Arbaco ah ayaa waxaa la filayaa in la soo geba-gabeeyo kulan wadareedka golaha Wasiirada Soomaaliya, isla markaana lag soo saaro qodobo wax looga qabanayo dhibaatooyinka kajira dalka Soomaaliya.
