Baydhabo-{WMN}- Xarunta Wasaaradda Gaashaandhigga Mareykanka ee Magaalada Washington waxaa ku kulmay Madaxweynaha JFS Xasan Sheekh Maxamuud & Xogyahaha Difaaca Dalkaas Lloyd James Austin oo kawada hadlay xoojinta xiriirka Amni, nabadda Afrika, tan Caalamka, la dagaalanka Al-Shabaab & kordhinta Taageerada Mareykanka uu siiyo Soomaaliya.
Madaxtooyada Soomaaliya oo faah-faahin ka bixisay kulankaan ayaa sheegtay in Xoghaye Austin uu ballanqaaday xoojinta qodobada ay kawada hadleen Madaxweynaha Jamhuuriyadda Federaalka si garab istaag xooggan ay u hesho Soomaaliya.
Xoghayaha Difaaca Mareykanka Lloyd James Austin ayaa intaas ku daray in Washington ay ka go’an tahay in la kordhiyo tababarka ciidamada Soomaalida si ay uga guuleystaan waxa reer Galbeedku ugu yeeraan “Argagixisada”.
James ayaa sheegay in nabadda Soomaaliya ay fure u tahay Gobolka & Adduunka sidaas awgeed aanay laga maarmin in Dowladda Federaalka lagu gacansiiyo qorshaha ay ku wajahayso sugidda nabadgalyada, Mareykankana ka go’an tahay garab istaagga Soomaaliya.
“Lloyd James ayaa tilmaamay sida dowladda Maraykanka ay uga go’an tahay adkeynta xiriirka iskaashiga labada dowladood, taageerada ay siiyaan shacabka iyo dowladda Soomaaliyeed ee arrimaha bini’aadannimada, tababaridda Ciidamada iyo la dagaallanka argagixisada” ayaa lagu yiri qoraalka Villa Somalia.
Madaxweynaha JFS Xasan Sheekh Maxamuud ayaa Xoghayaha Difaaca Mareykanka la wadaagay qorshaha Dowladdiisa ay ku wajahayso la dagaalanka Al-Shabaab, caqabadaha heysta & kaalmada Mareykanka uu ka geysan karo arrimahaan.
“Madaxweynaha Dowladda Federaalka Soomaaliya Xasan Sheekh ayaa kala hadlay Xoghayaha Difaaca Dowladda Maraykanka Mudane Lloyd James xoojinta xiriirka iskaashiga labada dal ee dhinacyada amniga, xasilloonida gobolka, kor u qaadidda taageerada Maraykanka ee Soomaaliya iyo dagaalka ka dhanka ah kooxaha argagixisada”.
“Madaxweyne Xasan Sheekh ayaa dul-istaagay dadaallada naf-hurnimada leh ee Shacabka Soomaaliyeed iyo Ciidaanka Xoogga Dalka ay kaga xoreynayaan argagixisada deegaannada kooban ay kaga sugan yihiin dalka, caqabadaha amni ee u baahan iskaashi caalami ah, si looga adkaado argagixisada cuuryaamiysay horumarka gobolka iyo guud ahaan Soomaaliya” Sidaasi waxaa lagu yiri qoraalka Villa Somalia ay kasoo saartay kulanka Madaxweynaha & xoghayaha Difaaca Mareykanka.
Madaxweynaha Mareykanka Joe Biden ayaa dhawaan amray in Soomaaliya dib loogu celiyo Ciidamadii Ameerikaanka ah ee lagu saaray go’aankii uu qaatay Madaxweynihii 45aad ee ka horreeyay ee Donald Trump si ay u taageeraan Ciidanka Soomaaliya & kuwa Midowga Afrika ee ATMIS Ku howlgalla.
