Baydhabo-{WMN}- Madaxweynaha cusub ee dalka Kenya William Ruto ayaa amar ku bixiyey in konteenarada xamuulka ee ay maraakiibtu keento, in lagu dejiyo oo laga fasaxo isla dekedda Mombasa, marka ay maraakiibtu keenaan, halka haatan koonteenrada iyo alaabooyinka ganacsiga la keeno goobo ku yaalla caasimadda Nairobi iyo deegaanka Naivasha.
Madaxweyne William Ruto ayaa sheegay inuu fulinayo ballanqaadkii uu ololaha ku galay, inkasta oo ay soo baxayaan walaacyo badan oo muujinaya in dekedda Mombasa ay buux dhaafi karto, haddii koonteenarada oo dhan halkaas la dhigo oo ganacsatadu kala baxaan.
Xukuumadda Kenya ayaa sannadkii 2019 waxay amar ku soo saartay in koonteenradu marka ay ka soo degaan dekedda Mombasa, in loo soo qaado Nairobi iyo Naivasha, si halkaas loogu fasaxo ganacsatada kala duwan iyo dadka ay u raran yihiin koonteenaradu.
Madaxweynihii hore ee Kenya Uhuru Kenyatta ayaa tallaabadan u qaaday si uu kor ugu qaado isticmaalka tareenka uu dalka Shiinuhu ku maalgeliyey illaa $4.5 bilyan oo dollar oo deyn ah. Tallaabadan ayaa ku khasabtay in shirkaduhu ay bixiyaan khidmadaha ku baxaya tareenka, si dawladdu ay u awooddo inay iska bixiso deynta uu ku leeyahay Shiinuhu.
Marka la eego sahan dhinaca dhaqaalaha ah oo la soo saaray sannadkan 2022, isticmaalka Khadka tareenku wuxuu kordhay illaa 22.6% sannadkii 2021, waxaana uu soo xereeyey lacag gaadhaysa illaa $108 milyan oo dollar, halka sannadkii 2020 uu soo xereeyey oo keliya $87 milyan oo dollar.
Dad badan ayaa ka walaacsan, haddii goobaha laga fasaxayo koonteenarada in dib loogu celiyo dekedda Mombasa, in arrintaasi hoos u dhigayso isticmaalka Khadka tareenka, taasina ay dhalin doonto, in dawladda Kenya ay awoodi weydo inay iska bixiso deynta lagu leeyahay.