Dilal kala duwan ayaa saacadihii la soo dhaafay waxaa ay ka dhaceen magaalada muqdisho ee Caasimadda dalka Soomaaliya, kuwaas oo loo geystay Ganacsato iyo Nabaddoon Caan ahaa Muqdisho iyo guud ahaan dalka.
Kooxo ku hubeysnaa Bustoolado ayaa Suuqa weyn ee degmada Wadajir ku diley ganacsade Daahir jugle oo kamid ahaa ganacsatada kasoo jeeda Magalada Cadaado ee gobolka Galgaduud.
Goobjoogayaal ayaa waxaa ay sheegeen in Ragga hubeysanaa ay Ninka oo Dhalinyaro ahaa ku dileen goobtiisa ganacsiga iyagoo markaasi ka dib goobta ka baxsadey, iyaga oo goobta ay tageen Ciidamo katirsan kuwa dowladda balse aysan ku guuleysan inay qabtaan dadkii dilka geystay.
Dhinaca kale Kooxo hubeysan ayaa Maanta gudaha Suuqa weyn ee bakaaraha ku dishay Nabaddoon kamid ah Nabaddoonada Soomaaliyeed, kaas oo la sheegay inay qaraabo dhow ay ahaayeen Wasiirka Wasaaradda Haweenka ee Xukuumadda Soomaaliya Xildhibaan Khadiijo Maxamed Diiriye, kaas oo magaciisa lagu soo koobay Nabaddoon Taakoow.
Magaalada Muqdisho ayaa waxaa inta badan ka dhaca dilal qorsheysan oo loo geysto, Askar, Mas’uuliyiin dowladeed iyo Ganacsato iyo Nabaddoono la sheegay inay xiriir la leeyihiin dowladda Soomaaliya, waxaana mas’uuliyadda dilalka sheegta Ururka Al-Shabaab.
