Ciidamo katirsan kuwa Millateriga Soomaaliya oo wata Gaadiidka dagaalka noocyadiisa kala duwan ayaa waxaa ay gaareen degmada Cadalle ee gobolka Shabeellaha dhexe si halkaasi uga bilaabaan guluf dagaal oo ka dhanka ah Ururka Al-Shabaab.
Maalmihii la soo dhaafay ayaa waxaa Gobolka Shabeellaha Dhexe kusii qul qulayay Ciidamo aad u farabadan, kuwaas dowladda Soomaaliya ay u qorsheysan howlgallada ka dhanka ah Al-Shabaab.
Janeraal Gacmadulle oo kamid ah Saraakiisha Ciidamada xoogga dalka Soomaaliyeed ayaa sheegay in u jeedkooda ugu weyn uu yahay sidii guud ahaan dalka looga xueryn lahaa Al-Shabaab.
Xildhibaan Xusul iyo Xildhibaan Yasiin Fareey oo Ciidamada xilligii ay ka baxayeen Muqdisho sagootiyay ayaa sheegay in, iyada oo la fulinayo amarkii Madaxweynaha ee ahaa in la bilaabo howlgallad ka dhanka ah Al-Shabaab, isla markaana qof kasta uu waajib ku yahay in uu ka qeyb galo dagaalka.
Sidoo kale waxaa ay sheegeen in howlgallada ka socda dhammaan Maamul Goboleedyada si lamid ah uu uga bilaabanayo Gobolka Shabeellaha Dhexe, ayna iyaga horkacayaan.
Howlgalka ka dhanka ah Al-Shabaab ee loo qorsheeyay in laga fuliyo Gobolka Shabeellaha Dhexe ayaa wati dheer qaatay, iyada oo meelo badan oo kamid ah Gobolkaas ay ku sugan yihiin Al-Shabaab.
Dowladda Soomaaliya ayaa dhowrkii bilood ee la soo dhaafay waxaa ay waday guluf dagaal oo ka dhan ah Ururka Al-Shabaab, waxaana Ciidanka dowladda iyo dadka Shacabka ah e hubka qaatay ay Al-Shabaab kala wareegeen degaano kuyaalla Gobolada Hiiraan & Galgaduud.
