Baydhabo-{WMN}- Barcelona oo suuqii xagaaga lacag 131 Milyan oo pound ah safkeeda kusoo xoojisay ayaa la filayaa inay markale suuqyada soo socda sida midka January dhaq-dhaqaaq kale samayso.
Mid kamida xiddigaha lala xidhiidhinayo Camp Nou ayaa ah kabtanka Wolves ee Ruben Neves oo ay u doonayaan bedelka Kabtan Sergio Busquets oo heshiiskiisu dhammaadka xilli ciyaareedkan ku eeg yahay.
Ruben oo la hadlayay muuqbaahiyaha Channel 11 ayaa sheegay inuusan jirin ciyaaryahan aan jeclayn inuu ku biiro Barcelona oo ay taasi tahay su’aal ciyaartoy kasta hortaala.
“Yaan dooneen inuu Barcelona u ciyaaro?, waxaan filayaa inay taasi tahay su’aal caam ah oo ciyaartoy kasta hortaala. Waa mid kamida kooxaha ugu waaweyn dunida, dabcan sharaf ayay ii tahay in la ila xidhiidhiyo kooxaha heerkaas ah” ayuu yidhi Ruben Neves.
Neves ayaa heli doona fursad gaar ah oo uu kooxaha ugu waaweyn Yurub iskugu muujiyo koobka aduunka oo uu meteli doono xulkiisa Portugal.
