Wasaaradda Gaashaandhigga Xukuumadda Federaalka ah ee Soomaaliya ayaa fah fahin guud ka bixisay dagaal saacado badan qaatay oo degaano katirsan Gobolka Hiiraan ku dhexmaray Ciidamada xoogga dalka iyo dadka degaanka oo iskaashanaya & Ururka Al-Shabaab.
Afhayeenka wasaaradda Gaashaandhigga Xukuumadda Soomaaliya Janeraal Cabdullaahi Cali Caanood ayaa sheegay in in ka badan 100 Xubnood oo katirsan Al-Shabaab lagu dilay dagaal ka dhacay deeggaanada Garas Magan iyo Ceel Hareeri ee gobolka Hiiraan.
Afhayeenka oo Warbaahinta kula hadlay Magaalada Muqdisho ayaa sheegay in Ciidamada xoogga dalka & dadka degaanka oo iskaashanaya ay weerareen Xubno katirsan Al-Shabaab oo isku aruursanayay degaanka Ceel-hareeri si ay u difaacdaan degmada Aadan-yabaal ee Gobolka Shabeellaha Dhexe.
Waxaa uu hadalkiisa uu intaasi kudaray in duqeyn dhinaca cirka ah iyo weerar dhulka ah ee lagu ekeeyay Al-Shabaab ay suuuro gashay in Xubno badan looga dila, isla markaana Ciidamada ay la wareegeen degaanka Ceel-hareeri oo hoostaga degmada Maxaas ee gobolka Hiiraan isla markaana 15km u jira degmada Aadan-yabaal ee Gobolka Shabeellaha Dhexe.
Sidoo kale Afhayeenka wasaaradda Gaashaandhigga Xukuumadda Soomaaliya Janeraal Cabdullaahi Cali Caanood waxaa uu sheegay in ciidamada xoogga dalka & dadka degaanka xog ay ka heleen degmada Aadan-yabaal ku ogaadeen ciidamo gurmad ah oo kasoo baxay degmadas, hayeeshee weerar jidgal ah oo lagu qaaday xilli ay marayeen degaanka Garas Magan ay dib ugu laabteen degmada Aadan-yabaal ee Gobolka Shabeellaha Dhexe, isla markaana rag badan looga dilay.
