Madaxweynaha dowlad Goboleedka Galmudug Axmed Cabdi Kaariye Qoorqoor oo ku sugna degmada Xarardheere ee gobolka Mudug ayaa kormeer ku tagay fariisamaha ciidamada xooga dalka iyo ciidanka daraawiishta Galmudug ay ku leeyihiin deegaanada hoostaga Xarardheere.
Madaxweyne Axmed Qoorqoor oo maalmahan joogay degmada Xarardheere ayaa waxaa uu saraakiisha iyo ciidamada xoogga iyo kuwa Galmudug ku bogaadiyay guulaha ay ka gaareen howlgalada lagula dagaalamayo Al-shabaab ee ka socda Gobolka.
Madaxweynaha Maamulka Galmudug oo la hadlaayay ciidamada ku sugan furimaha dagaalka ee Xarardheere iyo deegaanada hoostega degmadaas ayaa sheegay in loo baahan yahay inay ciidamada dardar-geliyaan howlgalada socda.
Kormeerka uu smaeeyay Madaxweyne Axmed Cabdi Kaariye Qoorqoor ayaa waxaa ku wehlinaayay saraakiil ka tirsan ciidamada xoogga dalka iyo kuwa daraawiishta dowlad Goboleedka Galmudug.
Ciidamada xoogga iyo dadka deegaanka ayaa maalmo kahor la wareegay degmada Xarardheere ee Gobolka Mudug oo sanno badan ay ku sugnaayeen dagaalamayaasha Al-shabaab, waxaana degmadaas lagu qabtay kulan looga hadlaayay xaqiijinta amniga degmada.
