Hay’adda dembi-baadhista ee FBI ayaa markale Arbacadii waxay baadhis ku samaysay guriga gaarka ah ee madaxweynaha Maraykanka ee Joe Biden ee ku yaalla Rehoboth Beach, oo ka tirsan gobolka Delaware.
Qareenkiisa gaarka ah ayaa sheegay inaan saraakiisha FBI aanay guriga ka helin wax waraaqo ah oo sir ah oo cusub, hase ahaatee ay qaateen agab kala duwan si ay ugu sameeyaan baadhis dheeri ah.
Qareen Bob Bauer ayaa bayaan uu soo saaray ku sheegay in baadhitaanka guriga madaxweynaha oo ka kooban saddex dabaq, inuu socday laga bilaabo 8:30 subaxnimo illaa duhurnimadii Arbacada, arrintan oo ku timi wada-shaqayn dhex martay hay’adda FBI iyo qareennada madaxweynaha.
Baadhitaanka guriga gaarka ah ee Joe Biden ayaa daba socday, baadhitaanno hore oo lagu sameeyey xafiisyadiisa iyo weliba gurigiisa oo hore loo baadhay oo laga helay waraaqo “sir ah” oo goobahaas la geeyey xilligii uu Joe Biden ahaa madaxweyne ku xigeenka Maraykanka.
Hay’adda FBI ayaa tan iyo xilligaas waxay qareen gaar ah u magcawday inuu sii wado baadhista waraaqaha sirta ah ee lagu kaydiyey xafiiska iyo guriga Joe Biden iyo hadii waraaqahaas ay arkeen dad aan loogu talo gelini.
