Guddoomiyaha Gobolka Banaadir Ahna Duqa Magaalada Muqdisho Yuusuf Xuseen Jimcaale (Madaale) ayaa shir jiraa’id oo uu ku qabtay Aqalka Dowladda Hoose ee Xamar ugu warbixiyay arrimo ku aadan is-heysadka iyo fulinta dhinaca dhulalkaGuddoomiye Madaale ayaa sheegay in dhulka Kaasa Italia ee degmada Xamarweyne ay leeyihiin Talyaaniga, isla markaana hada ay soo dirsadeen codsi ay ku doonayaan in loo banneeyo dhulka, si ay usoo degto safaaradda Talyaaniga.Wuxuu tilmaamay dhulkaasi aysan laheyd cid gaar ah, ayna sidoo kale jirin cid ay kala hadlayaan, waxaana dhulka Kaasa Italia laga barakiciyay dadkii deganaa, iyadoona lagu bilaabay howlo burburin.Guddoomiyaha Gobolka Banaadir ayaa ka hadlay qeylo-dhaanta maalmahaan kasoo yeereysay shacabka laga saaray dhulalkii ay deganaayeen gaar ahaan deegaanka Gubadley iyo Xaafadda Waxar-Cadde ee degmada Heliwaa,.Duqa Muqdisho ayaa tilmaamay inay la socdaan qaylo dhaanta kasoo yeertay dhulalkaasi, wuxuuna xusay in qof welba oo cabasho ah uu cadaalad doonto garsoorka.“Arrinta Gubadley iyo Waxar-Cadde ka taagan oo qolo walbaa siday rabto u hadaaqeyso qof walba oo sharci heysto ha dacwo tego, hana aado garsoorka, laakiin in bannaanka laga qayliyo wax macno ah oo ay soo kordhineyso ma laha” ayuu mar kale yiri Madaale.Duqa Muqdisho ayaa soo hadal qaaday eedda loo jeediyay qoyska madaxweyne Xasan Sheekh ee la sheegay inay boob ku hayaan dhulkaas, wuuna beeniyay, isaga oo tilmaamay in la doonayo in la’iska horkeeno bulshada Soomaaliyeed iyo madaxweynahooda.
