olaha ammaanka ee Qaramada Midoobay ayaa Maanta lagu wadaa inay Go’aan ka gaaraan qaadista cunaqabataynta hubka ee mudo sanado badan saaran dalka Soomaaliya, waxaana Golaha ay caawa yeelan doonaan kulan looga hadlayo arrintaas.
Golaha ammaanka ayaa la horgeyn doonaa labo qaraar oo ay soo diyaarisay dowladda Ingiriiska, isla markaana waxaa labada qaraar mid lagu tilmaamay inuu yahay in Soomaaliya laga qaado cunaqabateynta hubka oo dhan oo saaran tan iyo sanadkii 1992-kii.
Dowladaha Golaha Ammaanka ee QM oo 15 dowladood ka kooban ayaa maanta ansixinaya labadaasi qaraar, waxaana qaraarka labaad uu isna yahay in dib loogu soo celiyo cunaqabateynta hubka ee saaran Al-shabaab ee dagaalka kula jirta dowladda Soomaaliya.
Madaxweynaha dowladda Federaalka Soomaaliya Xasan Sheekh Maxamuud oo todobaadkaan bilowgiisii ka hadlaayay furitaanka kal-fadhiga afaraad ee Baarlamaanka Soomaaliya ayaa sheegay in cunaqabataynta hubka laga qaadi doono Soomaaliya, isagoo intaas kusii daray in arrintaas ay dowladda dadaalo badan ku bixisay.
Golaha Ammaanka ayaa cunaqabateynta saaray Soomaaliya sanadkii 1992-kii xiligaas oo la tilmaamay in goluhu uu ka hortagaayay qulqulka hubka ee dagaal oogayaashii isku hayay xiligaas gudaha Soomaaliya, kuwaasoo xukunka ka tuuray Madaxweynahii hore ee dalka Maxamed Siyaad Barre.
