Guddoomiyaha Gobolka Banaadir ahna Duqa Magaalada Muqdisho Yuusuf Xuseen Jimcaale (Madaale), Wasiir Dowlaha Amniga Gudaha ee XFS iyo Taliyaha Ciidanka Boliiska Soomaaliyeed ayaa maanta xarig jaray dhismaha qeyba cusub oo lagu soo kor dhiyay xarunta guud ee taliska ciidanka nabadgalyada Waddooyinka ee Taraafikada.
Munaasabada xarigjarkan ayaa waxaa goob-joog ka ahaa taliyaha ciidanka nabadgalyada wadooyinka S/Guuto Bishaar Abshir Geedi iyo saraakiil kale, kuwaasi oo Munaasabada oo ka dhacday Xarunta Taliska ka qeyb galay.
Taliye Bishaar ayaa madaxda iyo saraakiisha munaasabada ka qeyb gashay uga warbixiyay marxaladihii kala duwanaa oo uu taliska soo maray iyo horumarinta lagu sameeyay taliska taraafikada.
Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) ayaa kula dardaarmay saraakiisha iyo ciidanka nabadgalyada waddooyinka in ay dib usoo celiyaan tayadii iyo heybadii uu lahaa taliskan, isla markaana xal loo helo saxmada mararka qaar ka jira waddooyinka Caasimadda.
